Aningaasat inissinneqarnissaat tullinnguuppoq
Alloriaqqaarneruvoq Grønlandsbanke'p pisortaa Martin Kviesgaard oqarpoq.
Kalaallit Nunaanni Sulisitsisunut ulloq nuannersuuvoq, pisortaq Brian Buus Pedersen oqarpoq.
- London Miningip akuersissummik pinera isumaqarpugut nuannersorujussuusoq, GA'p pisortaa Brian Buus Pedersen oqarpoq, Grønlandsbankilli pisortaa Martin Kviesgaard nuannaarnini takutissanerlugu tunuarsimaarneruvoq.
- Tassa London Miningip ukiaq manna akuersissummik pissarsinissaa naatsorsuutigisimavarput.
Sulisitsisut Peqatigiiffiat qanittukkut aatsitassarsiornermik suliaqartut suleqatigiiffissaannik pilersitsivoq.
Tassani oqallisaavoq qallunaat kalaallillu sulisitsisut qanoq suleqatigiissinnaanerat, isumaqatigiissutinut London Miningip isumaqatigiissutaatut ittunut suleqataalernissaminnut.
Tulliuppoq pilersaarummut aningaasaliisussarsiornissaq, soorunami London Mining ilutsitsilluarnissaanik kissaapparput. Aamma Namminersorlutik Oqartussanut suliassaq pingaaruteqartoq tulleq tassaavoq isumaqatigiissutip atuutsilersinnissaa. Isumaqatigiissut IBA uatsinnut pingaaruteqarpoq, suliffeqarfiit sulisartullu Kalaallit Nunaanniittut siulliutinniarlugit. Brian Buus Pedersenip inuit akornanni neriulluarneq paasisinnaanerarpaa.
Kalaallit Nunaannut 14 milliardinik aningaasaliineq maannamut annertunerpaavoq, soorunalu aallartissaguni suliffissatigut aningaasatigullu isertitassatigut pingaaruteqassaqaaq.
Grønlandsbankip pisortaa aatsaat nalliuttorsiorumaarpoq, London Mining aningaasatigut isertitaqassappat.
Isumaqarpunga aatsaat nalliuttorsiutigisariaqartoq uppernarsarneqarpat London Mining aningaasassarsippat isumaqatigiissutillu tamaasa inissillugit. Amingaaterpassuaqarpoq nunamik atuisinnaanermut akuersissut tassaaginnarpoq alloriarneq siulliugallartoq.
London Mingip aamma amingaatingaa takutissallugu kalaallit suliniutaat nunarsuarmioqatit akornanni unammillersinnaasoq, Grønlandsbankip pisortaa oqarpoq.
