Aningaasassaarupput

Arnat assammik arsarlutik nunanut allanut unammisartui Brasiliamut unamminerni pissartanngorniunnermut anngussinnaagaluarlutik unammiartorsinnaajunnaarmata, taakkunannga sungiusaasup, Mikael Mulvadip, Kalaallit Nunaanni Timersortartut Peqatigiiffiisa Kattuffiat naammagittaalliutigaa.

Arnat unammiartornissaat 200.000 koruuninik naleqartussaavoq, aningaasallu tamaasa namminneq katersorsinnaasimanngilaat. Tamanna tunngavigalugu Timersortartut Peqatigiiffiisa Kattuffianut aningaasaliiffigineqarnissaminnik qinnuteqarput. Inuusuttut Arctic Winter Gamesimi Island Gamesimilu unamminernut peqataanerinut aningaasat atorneqarsimammata, qinnuteqaataat itigartinneqarpoq.

- Assammik arsartartut sisorartartullu nunarput sinnerlugu nunani allani timersorluni unamminerni angusarinnerpaasarmata, kattuffiup aalajangernera ajuusaarnarpoq, taamalu aalajangerneq paasisinnaanngilluinnarpara, assammik arsartartunik sungiusaasoq, Mikael Mulvad, oqarpoq.

Arnat assammik arsarlutik nunanut allanut unammisartut Brasiliamut unammiarsinnaaniassammata aningaasaliisoqassasoq, assammik arsartartut kattuffiata neriuutigaa.