Aningaasarsiornikkut ajornartorsiorneq Inatsisartut oqaluuserissavaat

Nunarsuarmi aningaasarsiornikkut ajornartorsiornermi sunniutit ilagissavaat, aningaasaateqarfik NunaFonden, suliffinnik aallartitsisunut kulturimillu suliaqartunut ukiut tamaasa miliuunikkaanik agguaasartoq, ukiuni tulliuttuni marlunni Grønlandsbanken-imit aningaasanik pissanngimmat.

- NunaFondeni GrønlandBankenimi piginneqataanermigut sinneqartoorutinik pissarsisarpoq. Aningaaseriviit annaassiniarnermik aaqqissuussinermut massakkut ilanngunnermikkut imminnut pisussaaffilerput, sinneqartoorutinik piginnittunut ukiuni marlunni akiliuteqassanatik, taamaammallu NunaFondeni ukiuni marlunni tulliuttuni 20 – 25 millioni koruuninik pinngitsoortussanngortutut ippoq, NunaFondenip siulittaasua, ilaasortaq, Kuupik Kleist oqarpoq.

Inuiaqatigiippassuit ajornartorsiorneq malugissavaat

Nunarsuaq tamakkerlugu aningaasarsiornikkut ajornartorsiornerup NunaFondenimullu sunniutaasa saniatigut, ajornartorsiorneq inuiaqatigiit assigiinngitsorpassuartigut aamma malugissagaat, inatsisartunut ilaasortaq Kuupik Kleist oqarpoq.

- Assersuutigalugu suliniutinut assigiinngitsunut nunanit allaniit aningaasaleeqatissarsiorneq ajornarnerulissaaq. Aningaasanik attartorneq akisunerulissasoq, pingaartumik namminersortut sanaartornerisa eqqorneqaatigisaannik. Taamaalillunilu aamma inuiaqatigiinni aningaasarsiornikkut ingerlatat pingaarnerit kigaallannissaat naatsorsiuutigineqartariaqarpoq, Kuupik Kleist oqarpoq, nangipporlu:

- Inatsisartut aqagu oqallinneranni aamma ilaasariaqassaaq, Nunatsinni suut sillimaffigisariaqarnersut, aningaasarsiornikkut eqqorneqarsinnaasut sillimaffigisariaqaratsigit, taamaaliussagaannilu aningaasat imaaliallaannaq atorneqarnissaat sillimaffigineqartariaqarpoq. Aamma innuttaasut sillimmartaartariaqalernissaat avaqqunneqarsinnaagunanngilaq, Nunafondenip siulittaasua, Inatsisartunut ilaasortaq Inuit Ataqatigiineersoq, Kuupik Kleist, oqarpoq.