Aningaasarpassuarnik nalilimmik tunineqarneq sunniuteqassanngilaq

Suliffissuaq kiffartuussinermik sulialik, ISS, 44 milliardit koruunilerlugu isumannaallisaanermik suliffissuarmit, G4S-imit, tulunnit qallunaanillu pigineqartumit, pisiarineqarpoq.
Allattoq Elisa Isaksen
oktobarip 18-at 2011 13:00

Suliffeqarfissuanngortoq inunnik millionit sinnilinnik sulisoqassaaq, nunatsinnilu ISS-imi sulisut 250-it missaanniittut soraarsitaanissaminnik ernumassutissaqanngitsut, pisortat qullersaat, Lars Andersen, oqarpoq.

- Sulisoqarnikkut allannguuteqarnata ingerlaannassaagut, niuernikkullu tunineqarneq sunniuteqanngikkallassaaq. Siunissamili ungasinnerusumi qanoq sunniuteqarumaarnera oqaatigisinnaanngilara; imaassinnaavoq suleriaaserput allanngorumaartoq, Lars Andersen oqarpoq.

ISS Grønland illoqarfinni arfineq-marlunni nunatsinni immikkoortortaqarpoq. Assigiinngitsunik suliaqartarput, eqqiaanermik isumannaallisaanermillu. Illuutinik ajoqusersimasunik iluarsaassinermik ilaatigut suliaqarlutik.

Suliffeqarfissuaq nutaaq nunarsuarmi isumannaallisaanermik kiffartuussinermillu suliaqartut annersarilissavaat, nunani 130-ni millioninik sulisoqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq