Aningaasaqarnikkut ingerlatsineq Inatsisartut ullumi sammissavaat
![Inatsisartut](/sites/default/files/styles/image_934x467/public/inatsisartut_kaassassuk4.jpg?itok=1LfGV67f)
Naalakkersuisut 2015-ip ingerlanerani saqqummiutassaat "aaqqissuusseqqinnerit sisamanik malitassallit", Attassinissamut Siuariartornermullu pilersaarummi ilallit, saqqummiussami qitiussapput, taakkualu nunatta aningaasaqarnikkut inissisimaffianik akunnatoorfiusumik iluarsiissutissatut naalakkersuisut isigaat.
Ernummassutissaqarporlumi.
Aningaasarsiornermi siuarsaaniarluni aaqqissuusseqqittoqanngippat, suliniuteqartoqanngippallu 2013-imi akit aallaavigalugit ukioq 2024/2025-inguinartoq 1 milliardi koruuninik ukiumut amigartoorutigineqartassasut, Naalakkersuisut Aningaasaqarnikkut Ingerlatsineq pillugu 2015-imut Nalunaarutaanni atuarneqarsinnaavoq.
Ilinniartitaaneq, takornariaqarneq aatsitassallu
Tamanna pingitsoortinniarlugu meeqqat atuarfianninngaanniit ilinniagaqarnissamut ingerlaqqittartut amerlinissaat, inuusuttut ilinniakkaminnik unitsitsiinnartarnerat ikilisarnissaat kiisalu suliffissaaleqisut ilinniarsimanngitsut suliffeqarfeqarfiit piumasaqaataannut naleqquttunik pikkorissarnissaat Naalakkersuisut anguniarpaat.
Ilaatigut aatsitassarsiorneq siuarsarlugu, aalisarnermit Nunatta aningaasat pissarsiarisartagai isumalluutaavallaarunnaarnissaat Naalakkersuisut aamma anguniarpaat.
Mittarfeqarfiit aaqqissugaanerisa nutarternerisigut, akitsuutillu appartinnerisigut takornariaqarnermi aningaasarsiorneq aamma qaffassarusuppaat.
Naalakkersuisut suliffeqarnermut ilanngaammik atuutilersitsinikkut sulilernissaq aamma pilerinarsarniarpaat.
Amerlanerit imminnut pilersussapput
Naalakkersuisut aamma ineqarnermut, akileraartarnermut isumaginninnermullu aaqqissuusseqqinneq aqqutigalugu utoqqalinissamut nammineq ileqqaagaqarnissaq, nammineq ineqarnissap pilerinarnerulernissaa taavalu sapinngisamik sivisunerpaamik suliffeqaannarnissaq pilerinarnerulersikkusuppaat.
Aningaasartuutit ikilisarniarlugit isertitaqarnerulersitsissutaasinnaasullu amerlisarniarlugit aaqqissuussinnissanut Naalakkersuisut piumassuseqartut, Andreas Uldum saqqummiussissutimini allappoq.