Aningaasaqarniarneq tapiissuteqartarnerlu G8-mi oqaluuserineqarput
Nunat suliffissuaqarfiusut pisuunerpaat, G8-mik taaneqartartut, Tysklandimi ataatsimiinnerminni aningaasaqarniarneq nunanullu ineriartortunut tapiissuteqartarneq ullumikkut oqaluuseraat. Siusinnerusukkut ataatsimiittarnerni Afrikamut ikiuinissamut neriorsuutit ilaatigut piviusunngortinneqarneq ajortut minnerunngitsumik oqaluuserineqarput.
- 30 milliardi dollarsit G8-mit Afrikamut immikkut ittumik tapiissutiginiarneqartut suli utaqqivavut, taakkualu saniatigut, aamma 8 milliardi dollarsit HIV-mut AIDS-imullu akiuiniarnermi atugassat, taama oqarpoq, Collins Magalasi, Malawi-mi suliniaqatigiiffimmit Action Aid-imeersoq. Taanna nunat G8-mik taaneqartartut ataatsimeeqatigiinneranni alaatsinaatsutut peqataavoq.
Magalasi isumaqarpoq, Buship Angela Merkel-illu ippassaq ulloqeqqasioqatigeereernerisigut, silaannaap pissusaa pillugu isumaqatigiissuteqarnissaq qanillattorneqarmat, taava Afrika pillugu pisussaaffiliinerusumik isumaqatigiissuteqarnissaq neriunartoqalersoq.
Naalagaaffiit G8-mik taaneqartartut ukiut marluk matuma siornatigut ataatsimeeqatigiinnerminni isumaqatigiissutigaat 2010 nallertinnagu nunat pisuut Afrikamut tapiissutigisartakkatik 50 milliardi dollarsinik amerliniarlugit, tassa 30 milliardi dollarsit suli amigaatigineqarput.
- Tapiissutigineqartartut siorna ikileriarsimapput, Afrikamilu inuit 8.000-it ullumikkut ullut tamaasa toqusarput, tassa HIV-p AIDS-illu akiorniarneranut 10 milliardi dollarsit amigaatigineqarmata, Magalasi oqarpoq, neriuutissaqarnerarpaali.
Ataatsimeeqatigiinnissaq sioqqullugu Angela Merkelip oqaatigaa Afrikamut nutaanik neriorsuinissaq pisariaqartinneqanngitsoq, kisianni neriorsuutaareersut piviusunngortinneqarnissaat pisariaqartinneqartoq.
- Neriorsuutitik piviusunngortinngikkunikkik politikerit taakkua uppernassusaat qinersisartuisa apeqqusertalissavaat, Collins Magalasi oqarpoq.
Naalagaaffiit G8-mut ilaasut siuttuisa nunanut ineriartortunut tapiissutit oqaluuserereerunikkik, Darfur, Kosovo aamma Kangia Qiterleq oqaluuserissavaat, silaannaallu pissusaa nukissaqarniarnerlu kingusinnerusukkut oqaluuserineqassapput.
