Aningaasaqarniarneq pillugu innuttaasunik ataatsimiisitsinerit

Ilulissani unnugu Sisimiunilu aqagu, akileraartarneq atugarissaarnerlu pillugit isumalioqatigiissitap suliaminut atatillugu killiffimminik saqqummiussaa oqaluuserineqassaaq, ilaatigummi tassani oqaatigineqarpoq innuttaasut ilaat suliffeqaraluartulluunniit ima akissarsiakitsigisut, allaat aningaasartuutiminnut matussusiisinnaanatik.

Tamatuma peqatigisaanik innuttasut ukiumikkut agguataarnerat allanngoriartorpoq, suliunnaarlutik pilersugassat ukiuni tulliuttuni 30-ni marloriaatinngortussaapput, naak sulisinnaasut pilersuisussat taamatut amerleriartussanngikkaluartut.

Taamaattumik aningaasaqarnermut isumalioqatigiissitap inerniliilluni oqaatigaa, ukiuni tulliuttuni 30-ni ukiumut 1 milliardit koruuninik ileqqaarniartoqartariaqartoq, tassa atugarissaarneq ullumikkutut ingerlaannarsinnaassappat.

Tassa aalajangigassat angisuut, innuttaasullu siunissaminnut tunngasunik oqalliseqataanissaat pisariaqarpoq.

Oqallitsitsineq siulleq Ilulissani unnugu pissaaq, aqagulu Sisimiuni. Ataatsimiisitsinerit taakku unnukkut arfineq marlunut aallartissapput.