Aningaasaqarnermut naalakkersuisoq illua tungiliuttunut isumalluarpoq

Inatsisartut ammaanersiorlutik oqallinneranni erserpoq, aningaasanut inatsisissatut Naalakkersuisut siunnersuutaat allamik taarserneqassasoq, amigartoornissaq aalassassimaarutigineqarluni.

Nukissiorfiit aktieselskabinngortinneqarnissaat tunuartinneqarpoq, nammineq atorniarsinnaalernissaa ajornarsilluni. Inissiat aserfallatsaalinissaat siunertaralugu attartornermut akit qaffannissaat naalakkersuisunit unitsinneqarpoq.

Inuit Ataqatigiit isumaqarput, aningaasanut inatsimmi ukiuni ataasiakkaani amigartoorsinnaaneq immini ajornartorsiutaanngitsoq.

- Kisianni ukiuni amerlavallaani amingartooruteqarpallaarpat, siunissamut upalungaarsarneq aserorneqassaaq. Tassa Alcoa-mut aningaaliissutissat ikilisinnissaat, Nukissiorfiit namminneq atorniarsinnaalernissaat, INI A/S-imilu aserfallatsaaliinissamut aningaasaliissutissat allatut aaqqinneqarnissaat oqalliseqataaffigerusupparput, Inuit Ataqatigiit siulittaasuat Kuupik Kleist oqarpoq.

Aningaasanut naalakkersuisoq, Per Berthelsen, illua tungiliuttunut isumalluarpoq.

- Naalakkersuisoqatigiit siuttuisa naapinnissai tullinnguuppoq. Siunissami pitsaasumik aqutsisoqassappat, maannamit ukiumut 170 mio. kr.-inik aningasartutikinnerunissaq pisariaqarpoq.

- Partiinut tamanut saqqummiuppara, Nukissiorfiit aktieselskabinngortinneqarnissaat nalilersoqqullugu, taamaalilluni Nukissiorfiit avataani aningaasaliisartunut atorniarsinnaalerniassammata, Per Berthelsen oqarpoq.

Demokratit siulittaasuat, Jens B. Frederiksen Radioaviisimut oqarpoq, suleqataanissamut piareersimallutik, kisianni Naalakkersuisut siunnersuutissaat takoqqaarlugit sipaarutissanik siunnersuuteqassallutik.