Aningaasaqarnermut ataatsimiititaliaq isumaqatigiinngitsoq
Aningaasaliissutinik nikisiterinikkut, Nuummi umiarsualivimmik containerersorfiusumik sananissamut misissueqqissaarnissaq akissaqartinniarneqarpoq, tassami maanna umiarsualiviusoq utaqqisitsivallaartalermat.
Aningaasaqarnermulli ataatsimiititaliaq tamatumunnga itigartitsivoq. Aningaasaqarnermut ataatsimiititaliap siulittaasuata tullia Demokraatineersoq Anda Uldum ataatsimiititaliap aalajangiineranut akerliuvoq, tamannalu ataatsimiititaliap ataatsimiinnerini ersersittarlugu.
- Massakkut Nuummiit avammut qivialaaginnaraanni umiarsuarpassuit utaqqiinnarmata, takusinnaavarput qanoq pisariaqartitsisoqartiginera, Anda Uldumip taamaalilluni qinnuteqaammut akuersaarnini oqaatigaa.
Ataatsimiititalialli ataatsimiinneranit imaqarniliami allaqqagaluarpoq, aningaasaqarnermut ataatsimiititaliap tamarmiusup qinnuteqaat itigartikkaa.
Aningaasat suliassatut pilersaarutinit allanit aningaasanik atuinikiffiunerusunit nikisiterinikut aaniarneqaraluarput - tassa aningaasartuutaanerunngitsumik nikisiterinikkut.
Tamannalu Anda Uldumip isumaqataaffigaa:
- Aningaasat atorneqarsimanngitsut pineqarmata, missingersuutinut sunniuteqanngitsumik nikisitsinikkut imaaliallaannarsimasassatut uanga isigilluinnaraluarpara, oqarpoq.
Tamannali aningaasaqarnermut ataatsimiititaliap akueriumanngilaa. Ataatsimiititaliaq aalajangiinermini allappoq, - Ataatsimiititaliaq isumaqarpoq, suliassat naammassineqarsimasutut oqaatigineqartunit aningaasaliissutinik nuussinerup kingunerisassaasa allaaserineri tamakkiisuunngitsut.
Tamatuma saniatigut aningaasaqarnermut ataatsimiititaliap assartuineq pillugu isumalioqatigiissitap isumaliutissiissutaata Inatsisartunit ukiaru oqaluuserineqarnissaa utaqqeqqaarusuppaa, tamannali ineriartornermik unittoortitsissasoq Anda Uldum isumaqarpoq. Taassuma Aningaasaqarnermut ataatsimiititaliap Assartuineq pillugu isumalioqatigiissitaq utoqqatsissutitut atormassuk tupigusuutigaa, tassami juunimi Assartuineq pillugu Isumalioqatigiissitap innersuussutai akimorlugit Arctic Umiaq Linep tapiiffigineqarnissaa aalajangiunneqarmat.
- Arctic Umiaq Line pillugu aningaasanik Naalakkersuisut sapaatip akunnialui matuma siornagut qinnuteqaataat 50 millioni koruunit sinneqartunik aningaasartalik Aningaasaqarnermut ataatsimiititaliamit akuersissutigineqarpoq, uanga akerliusunga. Tassani angallannermut ataatsimiititaliarsuup innersuussutai ersarilluinnaraluartut avaqqutiinnarneqarput imaluunniit tunulliunneqarlutik, Andreas Uldum oqarpoq.
Aningaasaqarnermut ataatsimiititaliap ataatsimiinneranit imaqarniliami ataatsimiititaliaq juulip tallimaanni tamarmiusoq isumaqatigiilluni taama aalangiisimasoq oqaatigineqarpoq.
