Aningaasaqarnera ilorraap tungaanut saatinniarneqarpoq

TV-utileqatigiit akiliisinnaajunnaarnissamut navianartorsiortut, Sisimiut-TV-iat, nutaarluinnarnik siulersuisoqarlutik ingerlaqqissapput, siornatigut naalakkersuisunut ilaasortaasimasoq KNI-llu siulersuisuini siulittaasuusimasoq Simon Olsen siulittaasoralugu. Tamanna issaannaq immikkut ittumik ataatsimeersuarnermi aalajangiunneqarpoq.
oktobarip 27-at 2009 13:08

Peqatigiiffik katillugit 4 millionit koruuningajannik akiitsoqarpoq, Simon Olsenillu erseqqissaaneratut peqatigiiffik aningaasaqarnikkut sanngiitsorujussuulluni. Taassumali Sisimiut TV-ata akiitsugaqarfissua Canal Digital peqatigalugu annaassiniutissatut pilersaarut suliaraa, ukiut tallimat ingerlaneranni Sisimiut TV-annik akiitsuerutitsisinnaasussaq. Aningaaserivimmit taarsigassarsiniarnissamut kommunip 150.000 koruuninik qularnaveeqqusiinissaa pilersaarutip kinguneraa.

- Peqatigiiffiup ilaasortaasa 600-nik amerlassuseqartut tamarmik ilaasortaanermut akiliutissatik dekodereqarnerminnullu akiliutissatik piffissaq eqqorlugu akilertartuuppatigik ernumanartoqarnavianngikkaluartoq, Simon Olsen illoqarfiup aviisianut Sivdlermut oqarpoq. Taassumalu siulersuisuusimasut akisussaaffimminnik ilungersorlutik atuisimannginnerat uggoraa.

- Maannali peqatigiiffimmut tatiginninneq uterteqqittariaqarparput takutillugulu ajunngitsumik ingerlasoqarsinnaasoq, Simon Olsen oqarpoq.

Canal Digitalip aallakaatitassiai aqagumiit isiginnaarneqarsinnaalissasut ilimagineqarpoq. Akerlianilli aningaasaqarnikkut annaassiniutissatut pilersaarutip kingunerissavaa, Sisimiut tv-ata tv-kkut aallakaatitassiornermik amigartoorutaasumik unitsitsigallarnissaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq