Aningaasanut inatsit ullumi saqqummiunneqassaaq: Politikkikkut taperserneqangaatsiartoq

Naalakkersuisut aappaagumut aningaasanut inatsisissaq ullumi saqqummiutissavaat.

Aningaasanut naalakkersuisoq, Erik Jensen (Siumut) tusagassiortunik aqqanermut katersortitsinissamut qaaqqusivoq.

Aningaasanullu inatsit politikkikkut siammasissumik taperserneqartoq pineqarpoq. Naalakkersuisoqatigiit tassa Siumut aamma Inuit Ataqatigiit saniatigut illuatungiliuttut partiianit Atassut isumaqatigiissummut atsioqataavoq.

Demokraatilli atsioqataanngillat.

Demokraatit siulittaasuata, Jens Frederik Nielsenip KNR-imut oqarnera naapertorlugu naalakkersuisut nerisassat akisunerannut atatillugu inunnut aningaasassaqarnerulersitsiniarnerat naammanngilaq.

Partiillu atsioqataanissaanut peqqinnissaqarnermut aamma aningaasanik pingaarnersiuisoqaqqaassasoq, taanna KNR-imut oqarpoq.

Partiit pingasut Inatsisartuni ataatsimut 23-usut taamaalillutillu amerlanerussuteqartut atsioqatigiipput.

Aningaasanut naalakkersuisuusimasup, Naaja Nathanielsenip (IA) aningaasanut inatsimmut missingiut aggustimi saqqummiuppaa, tassanilu inuusuttut, utoqqaat peqqinnissarlu pingaartumik sammineqarput. Tamatuma kingorna Inatsisaruni siullermeerneqarlunilu aappassaaneerneqarpoq.

Inatsisartunut qinikkat aningaasanut inatsit naggataarutaasumik novembarip 15-ianni taasissutigissavaat.

KNR-ip Naleraq suli oqaaseqartinngilaa.

Aningaasanut inatsit pillugu tusagassiortunik katersortitsineq knr.gl-ikkut toqqaannartumik aallakaatinneqassaaq.