Aningaasanut inatsit sipaarfioqisoq
NAQQITAQ:
Aningaasanut inatsit sipaarfioqisoq, partiit naalakkersuisuutitaqartut amerlanerussuteqalaarlutik akueraat, 16-it akuersimmata, 13-it naaggaartut.
Aningaasanut inatsisissatut siunnersuut saqqummiunneqaqqaarami 441 mio. kr-inik amingartoorfiusussatut siunnersuutaavoq. Kisianni aningaasaqarnermut naalakkersuisup Per Berthelsen-ip siunnersuutigisaatut, Nukissiorfiit aktieselskabinngortinneqarnissaanik imaluunniit allatut aaqqiivigineqarnissaanik tamanna tunngaveqarpoq.
Kisianni naluneqanngitsutut Nukissiorfiit allanngortinneqanngillat, aningaasanullu inatsimmi suli ilaasassalluni.
Taava Naalakkersuisut sukaterisimanngikkaluarpata, 2009-mi aningaasanut inatsit 667 mio. kr-inik amingartoorfiussagaluarpoq. Taamaammat aningaasartuutissat ilaat piiarneqartariaqarsimapput.
Alcoa-p Maniitsumi pilersaarutaanut atatillugu misissueqqaarnissanut aningaasaliissutissat 291 mio. kr-inik ilanngarneqarput, aappaagu 90 mio. kr.-nit tassunga atorneqassallutik.
Aamma illuliornermut aningaasaliissutissat ukiuni tulliuttuni pingasuni ukiumut 70 mio. kr.-inik ilanngarneqarput. Sipaarutit inuinnaat kommunillu illuliornerannut tapiissutinik eqquipput.
- Sipaarnermi atatillugu eqqaamaneqassaaq, ullumikkut sanaartornikkut ulapputtoqaqimmat, ingammik Nuummi illuliornerup akitsorneranik kinguneqartumik, Naalakkersuisut oqarput.
Illuliornermut sipaarniarnerminnut Naalakkersuisut aamma illersuutigaat, Anlægs og renoveringsfond-imi 800 millioner koruuninik uninngasoqarmat, naalakkersuisut ilanngarusutaannik.