Aningaasanut inatsit avissaartuutsitsivoq
- SIK-p siusinnerusukkut oqariartuutigereerpaa, pingaarnerunngitsoq ukiuni pingasuni siullerni pinngitsoorani sinneqartoortumik aningaasnut inatsisissap suliarineqarnissaa. Taama oqarpugut nalunnginnatsigu sinneqartoorniarnermik siunniussaqaraanni ajoraluartumik tamanna sulisartut pilliutigalugit pisarmat.
Nunatsinni sulisartut kattuffissuanni, SIK-mi siulittaasoq Jess G. Berthelsen taama oqartoq, Nunatsinni sulisitsisut peqatigiiffianni, GE-mi pisortaq, Brian Buus Pedersen ima oqarpoq.
- Aningaasatigut ajornartorsiornerput Inatsisartuni ilaasortanit paasineqanngippat, siunissaq eqqarsaatigalugu aningaasatigut suli ajornartorsiornerput annertusisussaavoq tamannalu aningaasarsiornissamik siuarsaanermut akornutaassaaq annertooq.
GE-mi pisortaq, Brian Buus Pedersen taama oqarpoq.
Aatsaat ukiut pingasut qaangiuppata sinneqartoortoqassaaq
Aningaasaqarnermut Naalakkersuisup, Andreas Uldumi aappaagumut Aningasanut Inatsit ippassaq tamanut saqqumiussaa, 65 millioner koruuninik amigartooruteqartussaavoq ukiunilu tulliuttuni marlunni aamma amigartooruteqarnissaq naatsorsuutigineqartoq tusarliullugu.
Tamannalu silatusaarnerusoq, SIK-p siulittaasua, Jess G. Berthelsen oqarpoq siunissamilu aningaasarsiornissamik isaatitsisoqarnissaanik isumalluarnini ima oqaatigalugu.
- Tusareerlutigu aatsitassarsiorfissuup GME-p qinnuteqarnissani qanittukkut nassiutissmaarlugu nalunaarutigereeraa aammalu taakku namminneq takusinnaasaat naapertorlugit, Narsami aatsitassarsiornissap imminut akilersinnaanera aamma sulisartunik 800-nik sulisoqarsinnaanera naatsorsuutigineqareersoq, taamaattumik tamakku eqqarsaatigalugit ukiuni tulliuttuni amigartoorutit matuneqarsinnaaneri naatsorsuutigaarput, Jess G. Berthelsen oqarpoq.
Aaqqissuusseqqittoqarnissaa pisariaqarpoq
Nunatsinni sulisitsisut kattuffianni, GE-mi pisortap, Brian Buus Pedersenip Naalakkersuisut kajumissaarpai aaqqiissuusseqqinerit pisariaqartut maanna aallunneqarnissaannik.
- Maanakkorluinnaq pisariaqarpoq aaqqissuusseqqinnerit aallartinneqarnissaat, tamannalu pillugu Naalakkersuisut aamma kajumissaareerlutigit.
Nunatsinni sulisitsisut peqatigiiffianni, GE-mi pisortaq, Brian Buus Pedersen taama oqarpoq.
Killissap qaangerneqannginnissaa mianerineqartariaqarpoq
Nunatta karsiata ukiuni tulliuttuni amigartooruteqarluni ingerlanneqarnissaa, Aningaasaqarnermut Siunnersuisooqatigiit siulittaasuata, Torben M. Andersenip upernaaq marsimili erseqqissaatigaa oqarlunili taamaattoqarnerani tamanna nakkutigeqqissaarneqartariaqartoq tassami aaqqissuusseqqinnerit pisariaqartut pinngippata aningaasarliornermut killissaa qanittuararsuusoq oqaatigalugu.
