Aningaasanut inatsit amigartooruteqarpoq

Nukissiorfiit ingerlatseqatigiiffinngortinneqarnissaanut isuma Inatsisartuni tapersersorneqanngimmat amigartoorutit aallaqqaammut 675 millioni koruuniupput. Aningaasallu naalakkersuisut atorsinnaasaat taamaammat 365 millioni koruuninik ikinnerupput. Nukissiorfiit ingerlatseqatigiiffinngortinneqarnissaanut siunnersuut Inatsisartunit ilalerneqarsimasuuppat, Nunatta karsiani amigartoorutit 76 millioni koruuniinnaassagaluarput, maannali 310 millioni koruuniullutik.

Taamaappat naalakkersuisut naalakkersuisoqarfimmilu atorfilittat sipaarniutissanik nassaarniarlutik ulapissimassaqaat.

Suummiuku sipaarniarfigineqarsimasut?

Alcoap Maniitsup eqqaani alumiiniumik aatsitsiviliorfissaanut atatillugu aningaasaliissutit naalakkersuisunit 291 millioni koruuninik ilanngaavigineqarput.

Sanaartornermut aningaasaaliissutit 2009-miit 2012-imut ukiumut 70 millioni koruuninik sipaarniarfiupput, namminersortut kommunillu eqqorneqartussanngorlutik.

Naalakkersuisulli oqaatigaat kollegialiortiternerit ukiumik ataatsimik siuartinneqartoq, kollegialiornissat aappaagu pinnatik ukioq manna pissallutik.

Pilersaarutinut aningaasaliissutit Sanaartugassanut Iluarsagassanullu Aningaasaateqarfimmi nassaassaasut maanna piviusunngortinniarneqalissapput. Aningaasaateqarfik taanna maanna 700 millioni koruuninik imaqarpoq.

Inatsisartut aningaasaqarnermut ataatsimiititaliaata siunnersuutigaa Arctic Green Foodimut aningaasaliissutit 4 millioni koruuninik ilanngaavigineqassasut.

Taamaasilluni sipaarniutissat katillugit 365 millioni koruuniupput.

Aningaasanulli inatsisip 2009-moortoq suli akuersissutigineqanngitsoq atuarfimmi nerisaqartitsisarnerup sipaarniarfigineqarnissaa aalajangiunneqareerpoq.

Atuartut ilaasa naammattunik nerisaqaratik ilaatigut atuariartortarnerat paasinarsimmat, naalakkersuisut atuarfimmi nerisaqartitsinermik aaqqissuussineq aallartippaat.

Aaqqissuussinermut taassumunnga aningaasaliissutit siorna 6,5 millioni koruuniusimariarlutik ukioq manna 5,9 millioni koruuniupput.