Aningaasanut inatsit amigartoorfiussaaq
Aggusti aallartisimalerpat aningaasaqarnermut naalakkersuisup Aleqa Hammondip aningaasanut inatsisissatut siunnersuut saqqummiussavaa.
Sermitsiap paasisai naapertorlugit 2009-mut aningaasanut inatsisissatut siunnersuut 250 miliuunit koruuninik amigartoorfiusussaq naalakkersuisut saqqummiutissagaat naatsorsuutigineqarpoq.
Kalaallit Nunaata namminersulernissaa aningaasanut inatsisissatut siunnersuummi ilanngunneqarpoq, Namminersornerlu pillugu Isumalioqatigiissitap siunnersuutaa naapertorlugu Kalaallit Nunaata akisussaaffiit tigusassai 30-t katillugit 300 miliuunit koruuninik naleqassangatinneqarput.
Namminersorneruneq eqqunneqarmat Kalaallit Nunaata akisussaaffiit tigusai, ataatsimoortumik tapiissutit aqqutigalugit aningaasalersorneqarput, nunarpulli namminersulissappat akisussaaffiit nammineq aningaasalersorneqassapput.
Taamaammat aningaasat 300 miliuunit koruunit nassaarineqartariaqassapput.
Akisussaaffiit qaqugu tiguneqassanersut Isumalioqatigiissitap siunnersuutaani piffissalersorneqanngillat.
