Aningaasanut inatsisissaq suli isumaqatigiinniutigineqarpoq

Aningaasanut inatsisissaq aappaagumoortoq suli isumaqatigiinniutigineqarpoq, naalakkersuisooqatigiillu Siumut aamma Inuit Ataqatigiit killiffik pillugu ullaatungaani nalunaaqutaq qulinut immikkut ittumik ataatsimiipput. Ataatsimiinneq ulloqeqqata missaani naammassimmat Hans Enoksen ima oqarpoq:

- Aningaasanut inatsisissaq, aporfiusinnaasut anguniakkatsinnullu tunngasut oqaloqatigiissutigaavut, oqaloqatigiinnerpullu ajunngilluinnartumik inussiarnersumillu ingerlapparput. Naalakkersuisut siulittaasuat nassuiaavoq.

Aamma oqarpoq, naalakkersuisooqatigiit partiit tunuliaquttatik uterfigeriarlugit ualeru pingasut missaanni naapeqqissasut.

Naalakkersuisooqatigiit aningaasanut inatsisissaq pillugu isumaqatigeereersimanissaat isumaqarnarmat, sooq immikkut ittumik ataatsimiittoqartariaqarsimava ?

- Tamatta partiitta anguniagaat naammassiniartussaavavut, illua´tungivut aamma taamaapput. Kisianni ualeru naapeqqissaavut, taamaalineranilu pisut nalunarunnaassallutik. Hans Enoksen oqarpoq.

Atassutip siulittaasua Finn Karlsen naalakkersuisut aamma Siumup siulittaasuanik Hans Enoksenimik kiisalu Siumup siulittaasuata tullianik Jonathan Motzfeldtimik oqaloqateqarpoq. Naalakkersuisooqatigiit isumaqatigiinngissuteqalersimanerlutik ?

- Atassutip siulittaasua oqaloqatigineqanngilaq, naammattuuginnarparsi maanga takkuttoq. Partiinik allanik oqaloqateqarnissarput pilersaarutaanngilaq, aamma kajumissuseqanngiivippunga nutaanik allanik isumaqatigiinniarnissannik. Naalakkersuisooqatigiit ataqqeqatigiilluta ingerlanerput pisussaavunga naammasseqqissaassallunga. Naalakkersuisut siulittaasuat erseqqissaavoq.

Aningaasanut inatsisissaq partiinut naalakkersuisunut illua´tungiliuttunut isumaqatigiinniutigineqarnera naammasseqqaarlugu naalakkersuisussanik nutaanik suaarutiginnissalluni Hans Enoksen oqareerpoq.

- Ualeru nalunaaqutaq pingasunut killiffik isumaqarpunga naammassineqartariaqalersoq, aamma innuttaasut utaqqinerat naammasserusuppara.

Hans Enoksen erseqqissaavoq.