Aningaasanut inatsisissaq nutaartakitsoq

Naalakkersuisut Alcoamut atatillugu 186 millioni koruuninik immikoortitsisariaqarnersut suli paasinarsinngilaq.

- Massakkut paasiniaassaagut, Alcoa nunarsuarmi aningaasarsiornikkut unittoorneq aallaavigalugu pilersaarutiminik kinguartitsissanersoq. Taamaanngippat pingaartorujussuuvoq, pilersaarutaareertunut tassanngaannartumik tunuarternaveersaarnissarput, Per Berthelsen oqarpoq.

Nukissiorfiit aktieselskabinngortinnissaat tunuartinneqaqqammerpoq. Aningaasanut naalakkersuisoq Nukissiorfiit pillugit oqarpoq, aningaasanik nammineerlutik atorniarnissaat siunertaralugu imaassinnaasoq, inatsisitigut naapertuussaasoqartariaqassasoq.

Aningaasanut inatsisissatut siunnersuut ullumi saqqummiunneqartoq, aasaq saqqumminneqartumut naleqqiullugu allaanerugaanngitsoq, Inuit Ataqatigiit siulittaasuat, Kuupik Kleist, naliliivoq.

- Naatsorsuutigisimagaluarparput, naalakkersuisut siunnersuummik nutaamik, allatut inernilimmik, massakkut saqqummiussaqassasut. Kisianni Alcoamut tungasut eqqaassanngikkaanni allaanerungaanngilaq. Taamaattumik nutaamik saqqummiussissoqartinnagu oqaaseqarfigiuminaappoq. Illua tungiliuttut isumaqatigiinniarfigissagaanni soorunami aamma taakkua kissaataasa ilaat ilanngunneqartariaqassapput, Inuit Ataqatigiit siulittaasuat Kuupik Kleist oqarpoq.

Per Berthelsen saqqummiigami aamma oqarpoq, Nunatta Karsia 2010-mi 2011-imiluunniit atorniartariaqalersinnaasoq.