Aningaasanut inatsisissap amigartooruteqarfiunnginnissaa ataatsimiititaliap piumasaraa
Ukiut sisamat aggersut katillugit 174,9 millionit koruuninik amigartooruteqarfiunissaat akuersaarneqarsinnaanngilaq.
Inatsisartut Aningaasaqarnermut Akileraartarnermullu Ataatsimiititaliaanni siulittaasoq, Hermann Berthelsen (S), KNR-imut aalajangersimasumik taama oqarpoq.
2021-mit 2024-mut sinneqartooruteqarnissamut amigartooruteqarnissamullu naatsorsuutit:
Naalakkersuisut 2021-mut aningaasanut inatsisissatut siunnersuutaat: 183,3 millioninik amigartooruteqarneq
Naalakkersuisut 2022-mut missingersuutigaat: 17,5 millioninik amigartooruteqarnissaq
Naalakkersuisuts 2023-mut missingersuutigaat: 29 millioninik sinneqartooruteqarnissaq
Naalakkersuisut 2024-mut missingersuutigaat: 3,1 millioninik amigartooruteqarnissaq
- Corona patsisigalugu aningaasarsiornermi inissisimaneq aallaavigalugu nalunartorpassuillu patsisigalugit Naalakkersuisut pinngitsooratik ukiuni makkunani aningaasaqarnitta amigartooruteqarfiunnginnissaa sinneqartooruteqarfiunissaaluunniit qulakkeertariaqaraat isumaqarpugut.
Naalakkersuisut suliniutaasinnaasut assigiinngitsut saqqummiuttariaqaraat, Hermann Berthelsen erseqqissaavoq.
- Taamaammat isumaqarpugut isumaqatigiinniutigineqarsinnaasut Naalakkersuisuninngaanniit saqqummertariaqartut, taamaalilluta iluarsaassinnaasagut aammalu immaqa sipaarniutaasinnaasut aningaasalluunniit arlaatigut atugassaanngitsut aamma nassaarisinnaassagatsigit, Hermann Berthelsen oqarpoq.
Sipaarniuteqarfiusinnaasunik nammineq siunnersuuteqarusunngitsoq
Hermann Berthelsenili sipaarniuteqarfiusinnaasunik nammineq siunnersuuteqarusunngilaq, akisussaaffillu tamanna aningaasaqarnermut naalakkersuisumut, Vittus Qujaukitsumut (NQ) ingerlateqqillugu.
Vittus Qujaukitsulli innuttaasunut ikiorsiineq sipaarniuteqarfigissanngikkaa Aningaasaqarnermut Akileraartarnermullu Ataatsimiititalia isumaqartoq, taanna erseqqissaavoq.
- Innuttaasunut ikiorsiinerit assigisaallu (sipaarniuteqarnernit, aaqq.) eqqugaassanngitsut isumaqarpugut. Sipaarniuteqarfissatulli Naalakkersuisut suleqatigalugit nassaarisinnaasavut amerlapput.
Ataatsimiititaliaq sipaarniuteqarfigineqarsinnaasunik nammineq qaqugu siunnersuuteqassanersoq, Hermann Berthelsenip oqaatigisinnaanngikkallarpaa. Naalakkersuisummi siunnersuummik nutaamik qaqugu saqqummiissanersut apeqqutaavoq.
Aningaasanut inatsisissaq kingusinnerpaamik novembarip ulluisa 15-ianni inaarsarneqareersimasussaavoq, piffissaliussarli kinguartinneqarsinnaalluni.
