Aningaasanut inatsimmut piareersarput
Taamaakkaluartorli isumaqatigiinniartoqartussaasoq, Maliina Abelsen radioaviisimut oqarpoq. Taassuma kissaatigaa Naalakkersuisut aningaasanut inatsimmut siunnersuutaat amerlanerpaanit oqaluuserineqarumaartoq, partiinillu pigiliutiinnakkat puigolugit oqallittoqassasoq.
- Aningaasanut inatsimmut siunnersuut isumaqatigiinniassutaajuartarpoq, aningaasanillu amerlanernik aallerfissaqannginnerarlugu oqartoqartuartarluni, Aningaasaqarnermut Naalakkersuisoq Maliina Abelsen oqarpoq.
Killilimmik isumaqatigiinniarnerit
Isumaqatigiinnerulerneq ujartussallugu anguniagaajuaannartoq Maliina Abelsenip erseqqissaatigaa:
- Politikkimi assigiinngeqisuni taamaattoqartarpoq. Pingaaruteqarporli oqassalluni, aningaasanut inatsisip eqqartorneqarnera killilimmik pisariaqartoq, aningaasanik tigusiffigineqarsinnaasut killeqarmata. Aningaasartuutit isertitanit amerlanerulersinnagit politikkimi isumaqatigiissutigigallakkat pisariaqarput, killiliussarlu anguniartariaqarparput, Maliina Abelsen oqarpoq.
Maliina Abelsenip aningaasanut inatsimmut siunnersuut sisamanngorpat tulliani saqqummiutissavaa. Inuiaqatigiillu aningaasassaannut sinneqarunanngitsunut, siunnersuutip tamarmik katiternera atuarneqareerpat partiit akornanni oqallittoqassaaq.
