Aningaasanoornermut inatsit EU-mi kinguarsarpaat
Inatsisit nutaat atuutsinneqalernissaannut siunertaagaluarpoq, nunat allamiut qarasaasiaq atorlugu aningaasanoortitsisarneri, Danmarkimi Kalaallit Nunaannilu unioqqutitsinikkut atorneqartalersimasut nakkutigineqarnerulernissaat.
Inatsisit atuutsinneqartussat pillugit, aningaasanoortitsisartut marluk naammagittaalliuteqarsimapput, tamannalu tunngavigalugu tassa maanna EU-p kommissionianit suliaq ingerlanneqalerpoq.
Naammagittaalliorneq pissuteqarpoq, aningaasanoortarfiit casino-t aamma qarasaasiat atorlugit aammalu aningaasanoortarfiit automatit, inatsisip atuutsinneqalernissaani assigiinngitsunik akitsuusiisoqartalissammat, tassalu qarsaasiat atorlugit aningaasanoortarfiit naalagaaffimmit aningaasalersorneqartussanngoraluarlutik.
Casinot naliginnaasut 40 aamma 70 procentit akornanni akitsuusiinermi akiliisinneqartartussaagaluarput, qarasaasialli atorlugit aningaasanoortarfiit 20 procentiinnarmik akitsuutinut akiliisartussaagaluarlutik, tassalu tamannarpiaavoq naammagittaalliuut.
Akitsuutit assigiinnginnerannut pissutaavoq, qarasaasiat atorlugit aningaasanoortarfiit, nunani allani ingerlanneqartut, akitsuutinut akiliutigisartagaat danskit naalagaaffiannit isiginiarneqarsimammata. Taakkulu isumaqarput, nunat allamiut qarasaasiaq atorlugu aningaasanoortarfii Danmarkimut qammarneqassappata 20 procentimik akitsuusiisarneq naammalluartuusoq. Taama nassuiaavoq danskit akileraartarnermut ministeqarfianni allaffissornikkut pisortaq, Lars Henry Nielsen.
Taanna isumaqarpoq, EU tunngaviusumik aalajangiisoq, tassami EU-p kommissioniata aningaasanoortarneq pillugu aammalu naalagaaffiup tamatumunnga aningaasalersuinissaa pillugu siullermeersumik suliaqalermat.
Inatsit EU-mit kinguarsarneqaraluartoq, taamaattoq Akileraartarnermut ministeqarfimmit ernummatissaqannginnerarput, naatsorsuutigineqarmammi inatsisinut nutaanut EU naggataatigut akuersiumaartoq.
