Aningaasanoornermik uerisimasorpassuit nalunaarusiarineqarput
Nunatsinni aningaasanoornermik uerisimasut pillugit nalunaarusiaq nutaaq Paarisamiit ullumi saqqummiunneqarpoq.
Nunatsinnilu inuit 57.000-t akornanni inuit 666-t aningaasanoornermik uerisimasutut nalunaarutigineqarput.
- Tupaallaatiginerpaasama ilagaat, aningaasanoornermik uerisoorsimasut akornanni amerlaqisut aningaasanoortarnertik pillugu sallusarsimammata, tassami maani nunatsinni ileqqoraarput immitsinnut assut ilumoorfigisarluta. Uanilu nalunaarusioreernermi paasinarsivoq amerlasoorpassuit qanoq aningaasanik atuisimatiginerminnik qanigisaminnut isertuussisarsimanerat, Paarisami pisortaasoq Bodil Karlshøj Poulsen taama radioavisimut oqarpoq.
Taassuma nuannaarutiginerarpaa, aningaasanoornermik uerisoornerup ajornartorsiutaanerata qanoq atugaatiginera pappiaratigut takussutissaqalermat.
- Nalunaarusiap uuma takutippaa angutit arnallu assigiimmik aningaasanoornermik uerisarnerat, assigiinngissutigilaaginnarpaalli arnat bingo-rtartut amerlanerulaarmata Bodil Karlshøj Poulsen oqarpoq.
Taassuma aamma nuannaarutiginerarpaa nalunaarusiaq kommuninut nassiussuunneqartussanngormat taamalu kommunit kommunip iluani tamatumannga politikkissaminnik oqaluuserinnissinnaalissammata.
- Assersuutigalugu oqaluuserineqarsinnaavoq illoqarfiup iluani qassinik oorinoorutinik automatinik peqartoqassanersoq, bingornerlu pillugu isummat annissornissaannut tunngavissaqartoqalerpoq, Bodil Karlshøj Poulsen oqarpoq.
- Asii Chemnitz Narup nalunaarusiaq tassa takkuppoq, alloriarneq tulleq taava suussava?
- Uanga pingaartittorujussuussavara kommuneqarfinnut angalaalerutta, kommunalbestyrelse-t taavalu nunaqarfinni aqutsisut peqatigalugit kiisalu innuttaasut oqalliseqatigissallugit maani inoqarfissinni ilissi bingortarnermut tunngatillugu aningaasanoortarnermut tunngatillugu pissutsit qanoq ippat? Qanoq ittumik inooriaaseqarusuppisi? Ajornartorsiutaava? Imaluunniit ajornartorsiutaanngila? Ajornartorsiutaappat taava taakkununnga inunnut pineqartunut neqeroorutinik inerisaasariaqarpugut tamatuma anigorneqarnissaa siunertaralugu, Asii Chemnitz Narup oqarpoq.
Nalunaarusiami erserportaaq inuit bingorumatuut inuit akornanniinnissartik pinerullugu bingortarsimasut, Asii Chemnitz Narupilu ima ittumik isumaliutersuuteqarpoq.
- Qanormitaava issagaluarpa bingortarneq annikillisillugu taavalu allanik neqerooruteqarsinnaanngortuugutta soorlu kulturikkut katerisimaarnikkut allallu, taavalu allatut immerlugu peqatigiinneq ataatsimoornerlu, Asii Chemnitz Narup taama oqarpoq.
Aningaasanoorutitut nuannarineqarnerpaat tassapput Lotto-t Joker-it, Keno-t, Bingo-rneq, eqquiniutillu kiliortortakkat kiisalu automatimik spillerneq.
HS Analyse-p suleqatigalugu misissuinermi inuit 1500-t immersugassamik nassinneqarput taakkunanngalu 791-t akissuteqarsimapput.
