Aningaasanoorajunneq ajornartorsiutaavoq
Tamanna killilersimaarniarlugu paasititsiniaanissaq aningaasaliiffigisariaqaraluarpoq, Inatsisartunut ilaasortaq, Emilie Olsen Atassut, Naalakkersuisunut apeqquteqaamminut atatillugu oqarpoq.
Taamaammat aningaasanoorajunnerup annikillisarneqarnissaa siunertaralugu Naalakkersuisut sunik suliniuteqarnersut apeqquteqaateqarpoq.
Inatsisartut siorna ukiakkut ataatsimiineranni Atassut siunnersuuteqaraluarpoq aningaasanoorajuttunut katsorsaanissamut 2.5 millioni koruunit atugassanngortinneqassasut. Siunnersuut amerlanerussuteqartunit taamani itigartinneqarpoq.
-Illoqarfinni nunaqarfinnilu angalasarninni ilinniartitsisut, kommunaalimi ilaasortat, angajoqqaallu ajornartorsiut pillugu oqariartorfigisarpaanga. Isumaqarpunga meeqqat atugarisaat pillugit misissuinermi, meeqqat pissakilliortut paasisaqarfigineqarneranni aningaasanoorneq pissutaaqataasutut taaneqarsinnaasoq, Emilie Olsen oqarpoq.
Emilie Olsen-ip ilanngullugu oqaatigaa kommuninit arlaqartunit ajornartorsiut akiorniarneqartoq ilisimagini, taamaakaluartorlu pisortat paasisitsiniaanissamut aningaasaliinissaat pisariaqassasoq.
Aningaasanoorajuttut qanoq amerlatigisut Qaqiffimmi katsorsartissimanersut kisitsisaatigineqanngilaq. Paarisap kisitsisit siorna saqqummersitaasa takutippaat nunatsinni inuit 650-nit ikinnerunngitsut aningaasanoorajunnerminnik nassuerutiginnissimasut.
