Aningaasanik tigusisarfik ataaseq isumalluutigaat
Aningaasanik tigusisarfiup Pisiffimmiittup atortuata ajortissimanera pissutaasoq, GrønlandsBankimi sullissisunut pisortap Peter Petersenip oqaatigaa.
Atuisoq Bodil Lyberth taxarluni aningaaserivimmut apuuppoq. Taanna nissumigut suliariteqqammerpoq, ajaappiartuullunilu:
- Illoqarfik taama angitigisoq automatimik pisiniarfiit arlaat ilaani peqarsinnaagaluarpoq, ingammik niuluttuulluni suliariteqqammertuullunilu. Allatut ajornartumik taxarlunga ammukartariaqartarpunga, Bodil Lyberth oqarpoq.
Aningaaserivik inoqarluarsimagaangami utaqqisorpassuaqartarpoq, tamannalu piffissaajaataasartoq, Bodil Lyberthip oqaatigaa.
Kåre Vid Stein taxartitsisuuvoq, aningaaseriviliarniartunillu ilaasoqakkajulluni. Taannattaaq isornartorsiuisunut ilaavoq:
- Taamaattoqarsinnaanngilaq. Nunatsinni illoqarfiit annersaasa tulliani ataasiinnarmik automateqarnera naammaginanngilluinnarpoq, Kåre Vid Stein oqarpoq.
GrønlandsBankip Sisimiuni immikkoortortaqarfia allanngortiterneqaleruttorpoq, umiarsualivimmilu utaqqiisaagallartumik aningaaseriveqarluni.
Aningaasanillu tigusisarfimmik ataasiinnarmik Sisimiuni peqartoqarnera, GrønlandsBankip sullissisinut pisortaata Peter Petersenip ajuusaarutigaa, ilanngulluguli oqaatigaa aaqqiisoqarnissaa sulissutigineqartoq:
- Aningaasanut tigusisarfiup atortussaa inniminnerneqareerpoq, automatilu illoqarfiup qeqqaniittoq januaari naatinnagu atuleqqikkumaarpoq, Peter Petersen oqarpoq.
Aningaasanik tigusisarfiit marluk Nuummi Brugsenimi inissinneqarsimapput, soorlu aamma marluk allat Pisiffimmi inissinneqarsimasut. Pisiniarfinni minnerni allani aamma automateqarpoq. Tamanna Sisimiuni aamma periarfissaagaluartoq, Peter Petersenip oqaatigaa.
Isumannaallisaaniarnerli aamma eqqarsaatigisariaqarpoq:
- Anigaasanik tigusisarfimmik pisiniarfimmi inissiiniaraanni isumannaallisaaniarneq aamma eqqarsaatigisariaqarpoq. Automati aningaasanik ulikkaartarpoq, tigusisarfiullu qanoq inissinneqarnissaa pillugu malittarisassaqarluni, taamaammat aningasanik tigusisarfimmik inissiiniarneq ilaatigut ajornakusoorsinnaasarluni, GrønlandsBankip sullissisunut pisortaa Peter Petersen oqarpoq.
