Aningaasanik pisariaqartitsilernissaq Naalakkersuisut ukiup affaani ilisimasimavaat

Royal Greenland 500 millioni koruuninik pisariaqartitsisoq, ullaaq Radioaviisimi oqaatigineqarpoq.

- Oqaatigissavara, pineqartut 500 millioni koruuniunersut suli ilisimannginnakkit. Kisianni ukiamut 2009-mi Royal Greenlandip taarsersuinermini akiligassai novembarimi 2008-mili eqqartorpavut, Hans Enoksen oqarpoq.

Nangilluni oqaatigaa, aningaasaqarnermut ataatsimiititaliaq tamatuma kinguninngua ilisimatinneqartoq.

- Taava suleqatigiisitamik pilersitsivugut, massakkumut suli ingerlasumik naatsorsuutigineqarporlu suliap inernera naammassillugu Naalakkersuisunngortussanut saqqummiunneqassasoq.

Uppernarsarsinnaaviuk, Atassutip siulittaasuata, aalisarnermut naalakkersuisuugallartup Finn Karlsenip, tamanna ilisimagaa?

- Tassa Naalakkersuisoqatinnut ilisimatitsissut novembarip 24-ani apuuppara. Ilisimatitsissut aningaasaqarnermut ataatsimiititaliamut apuuteriarlugu suleqatigiisitanik pilerisitsivugut, sapinngisamik pitsaasumik aaqqiiniaqatigiinnissaq siunnerfigalugu sulisumik. Suleqatigiissitami ilaatigut Naalakkersuisut siulittaasuata Naalakkersuisoqarfianit, Aningaasarsiornermut naalakkersuisoqarfimmit, Royal Greenlandimit kiisalu bankinit peqataasoqartoq, Hans Enoksen oqarpoq.

Naalakkersuisunut siulittasuugallartup aamma erseqqissarpaa, suliaq nipangiusimasariaqartutut nalilerneqarsimasoq.

Naalakkersuisooqataasut Atassutip ilisimatinneqarsimannginnerannik oqarneq ima oqaseqarfigaa.

- Suliaq ukiarmili aallartinneqareerpoq. Sianigisimangippassuk ajuusaarnarpoq, taamatummi nipilimmik saqqummiunneqarmat. Kisianni suliaq naammassilerpoq, aamma Naalakkersuisut nutaajunersut apeqqutaatinnagu Inatsisartunut pinngitsoorani saqqumiuneqartussaavoq, Hans Enoksen oqarpoq.