Aningaasanik igalaakkut milloorpugut?

Sisimiuni angerlarsimaffiit 2.400-ut immersugassanik tunineqassapput nukissiutinik atuineq pillugu paasiniaasoqarnerani. Misissuinikkut paasiniarneqarpoq issittumi illulioriaatsimi qanoq iliortoqarsinnaanersoq kiassarnermut sipaarniarluni. Taamaasilluni CO2-mik aniatitsineq illullu silaannaa pitsanngorsarniarneqarpoq. Sisimiut aviiseeraat Sivdlek taama allaaserinnippoq.

Misissuinermik ingerlatsisoq tassaavoq Tjekkiamiu Martin Kotol. Taassuma ilaatigut isumassarsiorfigisimavaa Sisimiuni illu nukissiutinik atuinikitsoq. Taanna ukiumut nukissiutinik 90 kilowatt-timenik atuiffiusarpoq nunatsinni angerlarsimaffiit naliginnaasut agguaqatigiisillugu ukiumut 416 kilowatt-timenik atuiffiusartut. Tassani takuneqarsinnaavoq illup oqorsagaanera aammalu illup iluani silaannaap nakkutigilluarnera aningaasanik sipaarfigineqarsinnaasoq.

- Neriuppunga innuttaasut apeqquteqaatinik, ilaatigut qassiullutik najugaqatigiinnersut, illulu qanoq angitiginersoq pillugu apeqquteqaatigineqartunut akissuteqarnissaminut piffissaqarsinnaassasut. Ilaatigut aamma ukiumut kiassarnermut uulia qanoq annertutigisoq atortarneraat, innaallagissamut qanoq annertutigisumik atuisarnersut, ilaqutariit akornanni sapigaqartoqarnersoq, astma-qartoqarnersoq, eksem-eqartoqarnersoq allatigulluunniit nappaateqartoqarnersoq aamma apeqquteqaatigissavara, Martin Kotol taama Sivdlermut nassuiaavoq.

Akissutit najoqqutaralugit takuneqarsinnaalissaaq angerlarsimaffiit pitsaassusaat qanoq innersoq tamatumalu kingorna angerlarsimaffiit 80-it misissoqqissaagassat toqqarneqassapput. Taakku neqeroorfigineqassapput akeqanngitsumik siunnersorneqarnissamik qanoq iliorluni illut iluarsaakkaanni nukissiutinik atuinermut sipaarneq anguneqarsinnaanersoq.

Immersugassat illunut agguaanneqassapput maajip naalernerani juunillu aallartilaarnerani. Misissuinermi angusat kulturikkut illorsuarmi Taseralimmi aggustimi saqqummiunneqassapput.

- Sapinngisamik tamat peqataatinneqarnissaat pingaaruteqarpoq, taamaattumik akissuteqaatigineqartut Taseralimmi paasissutissiissutigissavakka, soorluttaaq silaannarissartarfiit suut pisiarineqarsinnaanersut, illu ussissarsuarsimagaanni qanoq annertutigisumik sipaaruteqartoqarsinnaanersoq, illullu iluani silaannaq eqqortoq pillugit paasissutissiissallunga, Martin Kotol taama oqarpoq.