Aningaasaliisussaaleqineq unittoorutiginngilaa
Kalaallit filmiliaat siulleq ”Nuummioq” qaammatit marluk qaangiuppata immiunneqartussaq aningaasaliisussaaleqivoq. Mikisoq Lynge, filmiliortoq, massakkorpiaq aningaasaliisussarsiorluni Frankrigip kujataani Cannesimiippoq.
Allattoq Louise M. Kleemann
maajip 19-at 2008 11:23
Mikisoq Lyngep suliffeqarfiutaa ”3900 Nuuk” filmiliornissamut atatillugu Danmarkimi ”Det Danske Filminstitut”- imiit aningaasaliiffigineqarsinnaasimanngilaq, Danmarkimi filmiliorneq pillugu inatsisip Kalallit Nunaannut Savalimmiunullu atuutinnginnera peqqutaalluni.
Tamanna Mikisoq Lynge-p eqqumiigaa, danskillu naalagaaffianni innuttaaqataanini innersuussutigalugu. Tamannalu unittoorutiginagu filmip piviusunngortinnissaa sulissutigaa.
Nammineersinnaanerput takutikkusupparput Mikisoq Lynga Ritzau-imut ilaatigut taama oqarpoq.
Filmi 4,7 million koruuninik akeqassangatinneqarpoq, massakkumullu aningaasat 1,7 millioni koruunit pissarsiarineqareerlutik. Pilersaarut malillugu 2009-p naalernerani filmi takutinneqaqqaassaaq.
