Aningaasaliissutissatut siunnersuutit ikippallaarput

Ilinniarnertuutut naammassinnittut amerliartuinnavitsinneqassappata tamanna aaqqiivigineqartariaqarpoq.

Ilinniarnertuunngorniarfinni rektorit taama oqarput:

- Aningaasaliissutigineqartussatut siunnersuutigineqartut ikippallaarput, ullutsinnilu pissutsinut malinnaatinneqaratik. Akissarsiatigut aningaasaliissutit assersuutigiinnarsinnaavakka. Akissarsianut aningaasartuutit annertoorujussuupput, Kujataata Ilinniarnertuunngorniarfiani rektori Gregers Aaagard taama oqarpoq, nangipporlu:

- Ukioqatigiiaat marluk ataatsikkut meeqqat atuarfianniit aappaagu anisussaapput, ilinniarnertuunngorniarfinnilu inissat amerlineqartariaqassallutik. Ajornartorsiutaasorli tassaavoq aningaasaliissutigineqartussatut siunnersuutigineqartut naammanngimmata. Aningaasartuutissatut missingersuutit naapertorlugit ukioqatigiiaannut ataatsinut 800.000 koruunit aningaasartuutigineqartartussaapput, naammanngillalli. Aningaasartuutaasartussat ikinnerpaamik 300.000 koruuninik ilasariaqarput, tassa 1,1 millioni koruuninngortinneqartariaqarlutik. Akissarsiavut qaffanneqareerput, innaallagiaqarnermut kiassarnermullu aningaasartuutigut qaffanneqareerput. Taamaammat aningaasat aserfallatsaaliiniarnernut atugassat, aningaasallu atuakkanut atortussanullu atugassat sipaarniarfigisariaqarpagut.

Atuartitsineq taamaalilluni kalluarneqassaaq, Gregers Aagard nassuiaavoq.

Ilinniarnertuunngorniarfiit pingasut, tassalu GU-p, HTX-ip HHX-illu rektorii Qaqortumi Sulisartut Højskoleanni ukiumoortumik ataatsimiipput, naallu ilinniarnertuunngorniarlutik qinnuteqartartut ukiuni kingullerni amerliartuinnavikkaluartut ilinniarnertuunngorniarfiit ullutsinnut naleqqussarneqarsimannginnerat maluginiarsimagitsik tusagassiutinut allagaqaamminni rektorit oqaatigaat.

Ilinniartut inissaannut, ininut atuartitsivinnut, sulisunullu aningaasartuutit naammanngitsut oqariartuutigineqarpoq, allaanerusumillu aningaasatigut sinaakkusiinissaq pisariaqartoq oqaatigineqarluni.