Aningaasaliisoqarneratigut saffiugassanik qaqutigoortunik Paatusumi misissuisoqarsinnaanngorpoq

- Paatusumi septemberimit misissuilluta aallartissinnaanngorpugut, qulimiguulik atorlugu nunap pissusaanik uuttortaasoqassaaq, soorlu nunap qinngornerinik saviullu kajungerinerinut uuttoortaasoqassalluni. Naammassigutta inerneri takoriarlugit aappaaguminngaannit misissueqqissaarnerit qillerinerillu aallartissinnaassallugit.

Saffiugassat qaqutigoortut pineqartut tassaapput niob, tantal, zirkonium, uran aamma thorium. Taakku atortorissaarutinut assigiinngitsunut atorneqartarput, soorlu oqarasuaatinut angallattakkanut atorneqartartut.

Tunup kujataani misissuiffiusussap ungasinngisaani NunaMinerals kuultisiorsimavoq, tamatumalu ungasinngisaaniittoq nunaminertaq Paatusoq saffiugassanik qaqutigoortunik peqarsinnaanera ilimatsaanneqalersimavoq.

NunaMineralsip aningaasaqarnera pitsaavallaarsimanngilaq, siorna ukiup naanerani aningaasat tigoriaannaat 5.000-iupput, ukiup siuliani 3,9 million koruuniusimallutik.

Naatsorsuutit 2013-imeersut aamma takutippaat nalikilliliinerit ilanngukkaanni amigartoorutit 54,7 million koruuniusut, ukiup siuliani 15,1 million koruuniusimagaluarlutik. Taamaattumik Worthingtonip aningaasaliissuteqarnera iluaqutaassasoq Ole Christiansenip naatsorsuutigaa.

- Aningaasarsiorfigissagatsigu soorunami iluaqutaassaaq. Nunatsinnulli pingaarnerpaassaaq, aatsitassanut qalluinissamut periarfissanik nutaanik misissuinerit tikkuussisuusinnaammata.

Saffiugassat qaqutigoortut kangianit annerusumik piumaneqarnerupput, nunarsuarmi pissarsiassaasinnaasut 60 procentii Kinap pisiarisarpai, saffiugassallu qaqutigoortut ilisimaneqareertut ukioq 2029-mi nungussimanissaat ilimagineqarpoq.