Korea Kujallermi 2025-mi biilinik tingisartoqalissasoq
2025-mit biilit tingisartut.
Korea Kujalliup naalakkersuisuisa siunissamut biilinut allannguinissamut aningaasaleerujussuarneranni marlunngornermi saqqummersinneqartumi takorluugaat taama oqaasertaqarpoq.
Korea Kujalleq 1,7 billion woninik – tassa 10 millionit koruuninik aningaasaliivoq – aningaasat biilinut nammineq ingerlasartunut 2021-mit 2027-mut ineriartortitsinissamut atorneqassapput. Ineriartortitsinermilu biilit tingisinnaalernissaat anguniakkat ilagigaat, Reuters allappoq.
- Ikummatilinnik motooritortunit siunissami biilinut ikaarsaariassaagut, Korea Kujalliup nunamut namminermut ministeria, Sung Yoon-mo marlunngornermi oqarpoq.
Hyundai-ip 2025-p tungaanut 35 milliardit dollarit – tassa 230 milliardit koruunit biilinik nutaalianik ineriartortitsinissamut kiisalu pilersaarusiornermut aningaasaliinermut atorniarpai.
Biililiorfiup amerikamiut suliffeqarfiutaanik Aprivimik 1,6 milliardit dollarinik – tassa 11 milliardit koruuninik nalilimmik suleqatigiinnissamik isumaqatigiissuteqarneranut ilaavoq.
Aptiv biilinik nammineq ingerlasartunik ineriartortitsinermik suliaqartuuvoq.
Korea Kujalliup naalakkersuisuisa Hyundai-ip ingerlatseqatigiiffinnut annerusunut 2024-mi innutaasunullu 2027-mi biilinik nammineq ingerlasartunik neqerooruteqarsinnaalernissaa naatsorsuutigaa.
Korea Kujallermilu naalakkersuisut aningaasaliinerminni biilinut nutaalianut tunngatillugu Korea Kujalleq nunanit allanit kinguarsimanerunera pissutaasunut ilaanerarpaa.
Korea Kujalleq teknologiinut tunngatillugu allani siuarsimanerungaatsiaraluarpoq. Assersuutigalugu mobildatamut attaviit nutaaliaangaatsiarlutik.
/ritzau/Reuters