Aningaasaateqarfimmik pilersitserusupput
Juutit palasiat Danmarkimi inunngorsimasoq Israelimilu inatsisartuni ilaasortaasimasoq, Michael Melchior ataatsimeersuarnermi peqataavoq:
- 1.800 milliardit koruunit - gassip nassaarineqartup taama naleqarnissaa ilimagineqarpoq. Nunatullu Israelitut atsigisumut, Danmarkimit immaqa inoqarnerulaaginnartutut taaneqarsinnaasumut taakku aningaasarpassuupput, Michael Melchior oqarpoq.
Gassimik taama annertutigisumik nassaartoqarneratigut, Israel nukissiuutitigut annerusumik peqanngikkaluartoq, siunissami tuniniaallualersinnaavoq.
Michael Melchior oqarpoq, immap naqqani pisuussummik taama annertutigisumik nassaartoqarneratigut, Israelimiut kinguaariit arlallit pitsaasumik soraarnerussutisiaqalernissaat aamma avatangiisit pitsaanerulernissaat minnerunngitsumillu ilinniartitaanerup pitsaanerulernissaa qulakkiissagaa.
- Matumani apeqqutaassaaq iluanaarutigineqartut, suliffiutilissuarnut sisamanut tallimanulluunniit, inunnit ataasiakkaanit pigineqartunut taamaallaat iluanaarutissanngortinnagit nunamut maanga inuinullu tuttussanngortinneqassanersut. Suliffissuaatillimmi suna tamaat atorlugu namminneq kisimik iluanaarnissartik anguniartussaavaat, Michael Melchior oqarpoq.
Amerikamiut Israelimiullu ataasiakkaat uuliasiornermik gassisiornermillu iluanaarniuteqartartut kisimik iluanaaruteqannginnissaat anguniarlugu, Michael Melchior innuttaasut suliniaqatigiiffiannut annertusiartuinnartumut nukittuneraluttuinnartumullu siuttuuvoq. Taakku Norgep uuliasiornermit aningaasaateqarfiatut aningaasarpassuaateqartumut assingusumik, Norgip naalagaaffianit pigineqartutut ittumik pilersitserusupput.
- Gassisiornermit isertinneqartut 80 procentii naalagaaffimmut nakkartinneqartassapput, gassisiortullu 20 procentimik isertitaqarunik naammattorsuarnik isertitsisassapput, Michael Melchior oqarpoq.
Uuliasiortitseqatigiiffissuit gassisiortitseqatigiiffissuillu Israelimi politikerit 2001-imi aamma 2002-mi aningaasaateqarfimmik Norgimi pigineqartutut ittumik pilersitsiniarnerat akornuserpaat, tassa taamani Haifap avataani gasseqarfissuarmik suli nassaartoqanngikkallarmat.
Michael Melchior Israelimiullu allat isumaqarput, aningaasaateqarfimmik pilersitsinissaq taakku maanna akornusersortariaqanngikkaat.
Gassimilli annertoorujussuarmik nassaartoqarnera taakku kisimik isumaqatigiinngissutiginngilaat.
Libanonimiut oqaatigaat gassip nassaarineqartup ilaa, Libanonip imartaaniittoq. Taamaalilluni gassi Israelip Libanonillu aaqqiagiinngissutaannut ilannguteriaannaavoq.
