Aningaasaateqarfiliornissaq aappaagu eqqartorneqaqqissaaq

Naalakkersuisut Naaja Nathanielsen-ip meerartaarnermut atatillugu aningaasaateqarfiliornissamut siunnersuutaa tapersersorpaat, inatsisitigut misissugassat qulaarneqareerpata suliaq inatsisartuni aappaagu suliassanngorlugu ingerlateqqinneqartussanngorpoq, aammalu ataatsmiitiliamut suliassanngortinneqarluni.

Erninermut atatillugu sulinngiffeqarnermi atugassarititaasut nalaatsornerinnaasumik ullumi aaliangerneqartarput.

- Meerartaarnerup kingorna sulinngiffeqartussat tamarmik assigiimmik pitsaasumik atugassaqarnissaat siunertaralugu siunnersuuteqarpunga, aningaasaateqarfiliornissami sulisitsisoq, sulisartoq pisortallu aningaasaateqarfimmi akileeqataaffigisaannik, siunnersuuteqartoq Naaja Nathanielsen oqarpoq.

Meerartaareernermi suliffinngiffeqartut atugaat ajunnginnerusinnaasoq Naaja Nathanielsen isumaqarpoq.

- Suliffigisami isumaqatigiissuteqarneq aamma ilinniagaq apeqqutaalluni qanoq annertutigisumik aningaasanik pisinnaaneq apeqqutaasarpoq, Naaja Nathanielsen oqarpoq.

Meerartaarnermut atatillugu sulinngiffeqassagaanni anaanaasumut ataataasumullu aningaasatigut qanoq atugassaqartitaaneq nalaatsornerinnaavallaartoq Naaja Nathanielsen isumaqarpoq.

Sulisitsisumut artorsaataavoq soorlu arnanik amerlasuunik sulisoqarneq.

Taamaammat meerartaarnermut atatillugu aningaasaateqarfiliorneq nunatsinni pitsanngorsaataassasoq Naaja Nathanielsen isumaqarpoq.

Naaja Nathanielsen-ip siunnersuutaa ullumikkut taamatut isikkoqartillugu Naalakkersuisooqatigiinnit tapersersorneqanngilaq.

Aningaasaqarnermut Naalakkersuisoq Palle Christiansen Naalakkersuisooqatigiit tapersersuinnginnerannut ima tunngavilersuuteqarpoq:

- Maannakkut aningaasaateqarfiliorluni inatsisiliortoqarpat, isumaqatigiinniartut ilaasa isumaqatigiinniutigisassaannik inatsisiliorsimasugut isumaqartoqarsinnaavoq. Politikikkut taamaaliorneq ileqqupalaajuvoq, Palle Christiansen taama tunngavilersuuteqarpoq.

Siunnersuut upernaamut inatsisartut ataatsimiinissaanni aapaassaaneerneqarnissaa Palle Christiansenip siunnersuutigaa.

Akileraartarnermut Atugarissaanermullu Ataatsimiitsitaliarsuup isumaliutissiissutaa Naalakkersuisunit utaqqeqqaarneqarusuppoq, nutaanik iliuuseqalinnginnermi.

Isuma tamanna Inatsisartuni isumaqatigineqarpoq. Atassutip meerartaarnermut atatillugu aningaasaateqarfiliornissaq apeqquserpaa.

- Orniginarneruvoq, inuit ilaqutariit namminneq aningaasanik katersisalernissaat, pisortanit aningaasanik tunineqartuarnermit, Knud Kristiansen Atassummeersoq oqarpoq.