Aningaasaasat Ilulissani kaaviiaartut
Peqquserlulluni aningaasaliat atorlugit Ilulissani pisiniarfinni ataasinngornermi januaarip ulluisa 16-ianniilli marloriarluni akiliisoqarsimasoq politiit kalerrinneqarsimapput, politiillu misissuileruttorput.
- Assinik pitsaasunik nuutsitsisoqarsimarpasippoq, tassami pitsaangaaramik aningaasaasaanersoq ingerlaannaq paasineqarsinnaasimanngillat, Ilulissani politiit taama ilaatigut allaaserisaqarput.
100 koruuniusaliaq ataaseq 500 koruuniusaliarlu ataaseq atorlugit akiliisoqarsimavoq, aningaasaliallu taakku pisiniarfinniit politiinut tunniunneqareerlutik.
Aningaasat assinginik nuutsitsisoqarsimappat aningaasat assigiinnik serienormoqassasut, tassa tulleriinnik normoqassasut politiit nalunaarutigaat, taamaappallu peqquserlulluni aningaasaliaanerat sapernanngitsumik takuneqarsinnaasoq oqaatigalugu.
Tulleriiinnik normui maluginiakkit
Ilulissani Politiit kaammattuipput inuussutissarsiutigalugu ingerlatsisunut Ilulissanilu innuttaasunut aningaasat akiliutigineqartut pisinerminni imaluunniit allatut maluginialaassagaat.
Aningaasat ilumoortuunersut nalornissutigissagukkit aningaasamik allamik sanilliussillutit takusinnaavatit, taamatullu aningaasat tulleriinnik normui misissorlugit.
- Aningaasaasaq 100 koruuneq tulleriinnik normoqarpoq B O152 G (ataani teqeqqumi talerperlermi ikaartarfiup assitaata ataani)
- Aningaasaasaq 500 koruuneq tulleriinnik normoqarpoq A G122 D (ataani teqeqqumi talerperlermi ikaartarfiup assitaata ataani)
Aningaasaasanik taamaattunik tigusaqarsimagaanni Ilulissani politiit ingerlaannaq attavigineqarsinnaapput. Ilulissani politiit oqarasuaataasa normoraat 70 14 22.
