Angutit oqaloqatigiittarfissaat sinerissami pisariaqarput

Angutit tarnimikkut ajornartorsiuteqartillutik ataatsimoorlutik oqaloqatigiittarfissaannik sinerissami tamani pilersitsisoqarnissaa naligiissitaanissamut siunnersuisoqatigiinniit anguniarneqalerpoq.

Tamanna tunngavigalugu Ålborg-imi angutinut siunnersuisarfimmeersoq tikisillugu oqalugiartinneqarpoq.

Siunnersuisoqatigiit siulittaasuat Agathe Fontain aperaarput sooq taama anguniagaqalersaarnersut.

- Ilisimallugulu misigisimagatta angutit oqaloqatigiittarfissaannik sinerissami pisariaqartitsisoqartoq; Agathe Fontain oqarpoq.

Nalinginnaasumik angutit arnallu akornanni oqaloqatigiittoqartillugu tamatigut arnat oqaloqatigiinnerni aqutsisuugajuttarmata uani pingaartinneqarpoq angutit oqaloqatigiittarfissaanni angutaannaallutik uummammiuminnik aniatitsisarnissaat.

- Angutaannaallutik oqaloqatigiissinnaagunik taamaalillutillu namminneq aalajangersinnaallugu suna eqqartussanerlugu qanorlu ilillugu eqqartussanerlugu taamatut periarfissaqartitsinissaq pingaaruteqartutut isigivarput, oqarpoq.

Taamatuttaaq Agathe Fontain erseqqissaavoq angutit oqaloqatigiittarfiat pineqartillugu imaanngimmat angutit nakuusertartuinnaat kisimik pineqartut.

Oqalugiartitaasoq Ålborgimi angutinut siunnersuisarfimmeersoq Henrik Munkholm aperaarput angutit oqaloqatigiittarfiat pineqartillugu ajornartorsiutit suut nalaanneqarajunnersut.

- Angutip uummammiorisinnaasai suulluunniit pineqarput.

Soorlu angutit ilaat timimikkut anguterpaluttarput ilaat arnarpaluttarput, tassa imaappoq angutit ataatsimut isigalugu ileqqorisartagaat pineqartarput. Assersuutigalugu sangiattarneq eqqartorneqarsinnaavoq imaluunniit nakuuserneq perorsaanerluunniit imaluunniit sakikkunnik ilaquttanilluunniit arlaatigut ajornartorsiuteqarneq, sorpassuusinnaapput angutinut allanut annikkusunneqarsinnaasut, taama Henrik Munkholm oqarpoq. Taanna aperaarput, angutit ilaannit angummut allamut uummammiunik oqalunnissaq sapernarsinnaasarmat, qanoq ilillugu angutit ammartinneqarsinnaanersut.

Taanna akivoq angutit oqaloqatigiittarfianni aallartinnermi pingaaruteqartuusoq tatigeqatigiinnerup toqqissisimaqatigiinnerullu pingaartinneqarnissaata ilisimanissaa, tamannalu ataatsimoornikkut anguneqarsinnaasoq erseqqissaatigaa.

- Iserfik toqqissisimanartuullunilu, ataatsimoorneq toqqissisimanarigaanni taava oqaasissat namminneerlutik puttallakaalersarput. Ataatsimooqatigiinnerlu taamaattoq orniginartuusariaqarpoq, Henrik Munkholm oqarpoq.

Naligiissitaanissamut siunnersuisoqatigiit pilersaarutigaat quppersagaaqqanik qanoq ililluni angutit oqaloqatigiittarfissaanik pilersitsisoqarsinnaaneranik tikkuussisumik pilersitsiniarlutik. Taakkulu naqinneqareerpata kommuninut nassiussuunneqassapput.