Angutit marluk pinerliiniamik toqutaasumik ikiuisimanertik parnaarussaassutigaat

Angummik 22-nik ukiulimmik Københavnimi sapaatit-akunnerata naanerani marloriarluni pinerliiniarsimasutut pasineqartumik ikiuisimasutut angutit marluk eqqartuussisumit paarigallagassanngortinneqarput.

Angutit pineqartut ulluni qulini paarigallagassanngortinneqarput, immikkoortitaallutilli parnaarussaaqqassanngillat.

Aamma atuaruk Angutit marluk unnerluutigineqartut: Pinerliiniaq sakkussarsisimagaat

Københavnip Politeeqarfiani eqqartuussisumit inatsit tunngaviusoq naapertorlugu nalunaaquttap-akunnerini arlalinni killisiuisoqareersoq eqqartuussut taama inerneqarpoq.

Angutit pineqartut marluk toqutsinermut peqataasimasutut, toqutseriarsimasutut sakkortuumillu nakuusersimasutut politiinit unnerluutigineqarput. Aammattaaq pinerluttulerinermi inatsimmi sakkut pillugit aalajangersakkanik unioqqutitsisimasutut unnerluutigineqarput.

Aallaasia toqqorsimagaat

Politiit naapertorlugit, saassussinerup siulliup kingorna aallaat atorneqartoq toqqorsimavaat angullu 22-nik ukiulik, sapaatiummat ullaakkut toqunneqartoq, aamma toqqorsimallugu.

Unnerluutigineqartut pisuussuteqannginnerarput.

Aamma atuaruk Toqutaasut Danmarkimi eqqaaniarneqassapput

Københavnimi Østerbromi oqallittunik aammalu Krystalgademi juutit naalaffiannik saassussinerit politiit pinerliiniarnertut taavaat, angutilli pineqartut marluk, pinerluttulerinermi inatsimmi aalajangersakkat pinerliiniarnermut tunngasut tunngavigalugit unnerluutigineqanngillat.

Toqutsinermut peqataasimasutut, toqutseriaraluarsimasutut nakuusersimasutullu "taamaallaat" unnerluutigineqartut, eqqartuussissuserisut pisortaat Dorit Borgaard Ritzaumut ullumi taama oqarpoq.

Angutit pineqartut sapaatit-akunnerini sisamani paarigallarneqarnissaat unnerluussisussaatitaasup piumasarigaluarpaa, aammattaaq immikkoortitaallutik parnaarussaaqqanissaat piumasaralugu, tamannali eqqartuussisup malikkumasimanngilaa.

/ritzau/