Angutit arnanik sineqateqarnertik anernikilliornarisaraat
Kisimiilluni tassa sineqateqarnani sinittarnissaq peqqinnartuusoq Østrigemi ilisimatuunit paasineqartoq nutaarsiassaqartitsivik Ritzau tusarliussivoq.
Arnat kisimiillutik sinikkaagamik sinnarinnerusarput angummilli sineqateqaraangamik sinnarlunnerusarlutik, angutilli arnamik tutitaqarlutik sinikkaagamik sinnarinnerusartut, Wienip ilisimatusarfiani misissuinerni taama paasisaqartoqarpoq.
Angutilli arnamik tutitaqarlutik sinittarnerat aamma ajoquteqalaarsinnaasoq paasineqarpoq, tassa paasineqarpoq arnamik sineqateqartut anersaartornerat allaanerusarsimasoq, tamannalu pissutigalugu angutit eqqarsarsinnaanerat sanngiinnerulersartoq.
Tassa angutit arnamik sineqateqareersut, angutinut allanut kisimiillutik sinitsitaasimasunut naleqqiullutik, suliakkiissutaasunik eqqarsarnartumik naammassinninniarnertik ajornakusoortinnerusaraat paasineqarpoq.
Misissuinermi aqutsisoq Gerhard Klösch oqarpoq misissuinermi paasisat taamaannissaat siornagut ilimatsaanneqartarsimasoq, arnat hormonii angutit anersaartornerisnut akornusersuissartut ilisimaneqarmat.
Arnat angutillu sineqatigiittarnerat pillugu misissuinermi aamma paasineqarpoq arnat sineqateqarsimagunik kisimiillutilluunniit sinissimagunik tamanna suliassaminnik naammassinnissinnaassusaannut sunniuteqarpiarneq ajortoq.
