Angutit angerlarsimaffimmi ikiuukkaangata avinnissaq ungasinnerusarpoq
Misissuinermilu nutaami London School of Economics-imeersumi paasinarsivoq angutit angerlarsimaffimmi ikiuukkaangata meeqqanillu paarsinermut akisussaaqataagaangata avinnissaq ungasinnerulersartoq.
Misissuineq Tuluit Nunaanni aappariit 3.500-t akornanni suliarineqarpoq, naallu misissuineq Tuluit Nunaanni pigaluartoq, inerneri Danmarkimi aamma taamaassapput, Rigshospitalimi tarnip pissusaanik ilisimasallit pisortaat Svend Aage Madsen taama naliliivoq.
- Danmarkimi imaluunniit nunani avannarlerni aamma misissuinerit nalunngilavut, taakkunanilu paasinarsivoq aamma ataatani aapparmik ernineranut atasumik sulinngiffeqartartuni avittarnerup procentia ataatanit taamatut sulinngiffeqarneq ajortunit annikinnerujussuusoq. Tupinnanngilaq aappariit tamarmik nal. akunnerini 37-ni sulisarsimappata, taakkualu arlaat nalaasaarfiup nerriviusaanut nissuni qaqillugit tv-mik isiginnaarujoortarpat aappaalu niaqulaartutut iliorluni ulapissuataartarpat, taakkunani aappariinneq atangaarneq ajormat, Svend Aage Madsen oqarpoq.
Aapparisaq aapparmininngarnit ulapinnerugaangat aappariinneq aserortartoq Tuluit Nunaanni misissuinerup takutippaa.
Tamanna pillugu angutit pingaartumik ilaqutariinni meerartalinniittut siunnersorneqarput tukassaaginnaratik aammattaaq meeqqanik isumaginninnerusariaqartut.
- Ikioqatigiiffissaq tassaavoq meeqqanut akisussaaqatigiinnissaq, isumaqarpungalu tamanna pingaarnerpaasoq, misissuinermilumi aamma ilaqutariit meerartallit misissuiffigineqarsimammata. Errugassat eqqiaaneq allallu pillugit oqqannerit amerlasaqaat, isumaqarpungali annertuumik allannguuteqassasoq aappariit arlaat meeqqanut tunngasunut tamanut tamakkiisumik akisussaaffeqassappat, taava equngassutit piiarneqarujussuassapput, Svend Aage Madsen naggasiivoq.
