Qulaarpaa Angutaanikuuvunga maannali arnaavunga

Monica Samuelsen Ilulissani 1990-imi inunngorpoq, 2008-imili Erni - tassa angutitut atini - inuulluaqquaa Monicamillu ateqalerluni. Monica maanna Københavnimi ilinniartuuvoq, Nunatsinnullu siunissami uteqqinnissani naatsorsuutigaa.

- Arnatulli inuulerama Kalaallit Nunaannut uteqqinnissara qunuginikuaara, apriililli aallartinnerani Nuumiikkama Ilulissanilu tikilluaqquneqangaarama tuppalliutigeqaara nuannaarutigalugulu, Monica Samuelsen nuannaarluni oqarpoq.

Pissutsilli taamaattuaannarsimanngillat. Monica Samuelsen meeraannermini nukappiaqqatut allatut pissuseqannginnami meeraqatiminit qinngasaarneqartarpoq. Angerlarsimaffimminili toqqissisimasumik inuuvoq, niviarsiaqqatut pissuseqarnera ilaqutaanit akuerineqarluni.

- Anguteqatinnoortuunera pillugu ilaquttannut oqarnikuunngilanga, isumaqartaramami nalunngereeraat, taamaammat pissusissamisoortutut ilaquttamma tigunikuuaat tamannalu uannut toqqissisimanarpoq, Monica Samuelsen oqarpoq.

Aamma atuaruk Suiaqatinoortuuneq: Assuarisaanermit akuerisaanermut

Erni inuulluarit, Monica tikilluarit

Monica Samuelsen Esbjergimi 2008-imi najugaqartilluni angutit atisaannik peqarpoq, kammalaatimili atisai atortillugit illoqarfissioreerlutik angutitut inuuneq qimassallugu aalajangerpoq.

-Aalajangerama arnatut inuulissallunga, angutitut atisakka tamaasa atornikuerniarfimmut tunniuppakka, taamanili arnatut atisalersortuaannalerpunga, Monica oqarpoq.

Monica pillugu paasissutissat

  • Monica fotomodellitut saniatigut sulisarpoq.  
  • Monica inuit allattorsimaffianni angutitut suli allaqqavoq.  
  • Inuup normuani kisitsisit kingulliit sisamat suli nikinnikuunngillat, atia taamaallaat allanngornikuuvoq. 

- Ukiut marlut affarlu aappaqareernikuullunga, qimakatta nammineq aalajangerpunga aappaqarnianngikkallarlunga. 

Kalaallit Nunaanni tikilluaqqusaaneq 

  Monica ukiuni arfineq-marlunni nunatsinniinnani, tikikkami paasivaa pissutsit allanngorsimaqisut.

- Kalaallit Nunaanni pissutsit sivisoorujussuarmik eqqartorneqarsinnaasarput, maanili ingerlaannaq puigoqqinneqartarput takusat. Isumaqanngilanga Kalaallit Nunaanni Danmarkimilu anguteqatiminoortartut arnaqatiminoortartullu akuerisaasimasut, naamik naamivik, soorunalimi inuppassuaqarpoq aamma suli tamakkununnga akerliusut, akuerineruneqarnikuuppulli Monica oqarpoq. 

Monicap siunissami qaquguugaluarnersoq uteqqinnissani naatsorsuutigaa, maannami nunatsinnut angerlarsertarnini sakkortusiartortoq malugigamiuk. Oqarsinnaanngikkallarpoq Kalaallit Nunaannut nuukkusunnerluni.   

- Kammalaatit ilaquttallu najornissaat ajornanngingaarmat angerlarsertarnera maannakkut sakkortunerujussuuvoq, tassalimi tikilluaqqusaasutut misingisimangaarama, Monica naggasiivoq. 

Isummersuutit


 

Pages