Isiginnaagassiaq: Angut kalaaleq nutaaliaasoq qanoq-ittuua?
Angut kalaaleq nutaaliaasoq 2017-imi qanoq-ittuua?
Angutivik nukittullunilu anguterpaluttariaqarpa? Imaluunniit ajuallajanerulluni malussarissuua? Taassuma akissutaa isiginnaagassiap "Angutivik"-iup takutinniarsaraa.
- Sapiitsoq, misigissusilik, nukittooq aamma nukittuujusariaqanngilaq. Sanngiitsoq. Amerlaqaat, isiginnaartitsisartut Hans-Henrik Poulsen, Miki Jacobsen, Klaus Geisler Kristian Mølgaardilu angutivik pillugu taama oqarput.
Angut kalaaleq takutinniarneqartoq
Nipilersornikkut, qitinnikkut, timikkut kisimiillunilu oqalunnikkut angut kalaaleq isiginnaagassiami takutinniarneqarpoq. Angutip sinnattui, asanninnerat aliasuutaallu isiginnaagassiami isiginnaartitsisartut ilaatigut takutinniarsaraat.
Suiaassuseq apeqqutaatinnagu, tamatta naligiippugut. Inuunermi aqqusaartakkavut assingupput, isiginnaagassiap tamanna takutinniarsaraa.
- Angutivik kinaanersoq takorluugaq inornartuuvoq. Tamatta inuinnaavugut, tamatta nakkarfeqarpugut qaqiffeqartarlutalu. Tamakkua oqaluuserinissaat ersigissanngilarput, isiginnaagassiortulerisoq Nunattalu Isiginnaartitsisarfiani isiginnaartitsisarfimmi pisortaq Susanne Andreassen oqarpoq.
Isiginnaagassiaq arnanit suliarineqartoq
Isiginnaagassiaq arnamik ilitsersuisoqarpoq, arnamik isiginnaagassiortulerisoqarpoq arnamillu isiginnaagassiaq allanneqarluni. Angutit pillugit qanoq ilisimasaqartigippat? Tamanna paasiniarlugu isiginnaagassiamik allattoq Niviaq Kornerliussen paasisassarsiortariaqarsimavoq:
- Arnatut allalluni, tassami imatut eqqarsarneq ajorpugut arnatut eqqarsarpunga imaluunniit angutitut eqqarsarpunga, kisianni uani pingaartinnikooqaarput oqaluttuat piviusuminngaanniit tigulaariffiginissaat, Niviaq Korneliussen taama oqarpoq.
Isiginnaagassiaq kalaallisuujusoq "Angutivik" septembarip arfineq-pingajuaniit qulingat tikillugu takutinneqassaaq. Aammattaaq Maniitsoq, Sisimiut, Aasiaat, Ilulissat, Nanortalik, Qaqortoq Paamiullu tikinneqarumaarlutik. Aappaagu upernaakkut qallunaatut Danmarkimi takutinneqarumaarpoq.
