Angut ujaarineqartoq ajunngitsoq nassaaraat
Angut Nuummi Politiinit ippassarli unnukkut ujaarineqartoq Akiani Imartunermi ajunngitsoq ullup qeqqata siorna nassaarineqarpoq.
aggustip 12-at 2009 11:14
Ujaasineq ajunngitsumik tassa kinguneqarpoq, angut qiiaqisoq politiit ullaap-tungaa qulip-qeqqata missaani nassaarimmassuk.
- Angut qissattaamminik aalisarsimavoq, umiatsianilu sumiifferussimallugu.
Ippassaq unnukkut ujaarilerparput, oqarasuaatikkullu angallattakkakkut attaveqarfigigaluarlugu. Oqarasuaatimigut ullaaq akinngimmat qulimiguulik Akianukartipparput, nassaaralutigulumi, Nuummi Politeeqarfimmi pigaartoq, Frederik Heilmann, Sermitsiap nittartagaanit issuarneqarpoq.
Annaassiniarnermi nakorsaq qulimiguulimmut ujaasisumut ilaavoq, angulli ujarneqartoq qiianermi saniatigut ajunngimmat nakorsaq ikiuuttariaqarsimanngilaq.
Angutip umiatsiaa aamma nassaarineqareerpoq, angullu umiatsiaminik maanna Nuummukarpoq.
