Angut tunumi nannumit saassunneqartoq
Nannut najugaqarfiusunut qanillattortut pillugit oqaluttuat ulluni makkunani amerlapput. Nannut marluk Ittoqqortoormiini sapaatip akunnerata siuliani aallaaneqarput, nanorlu Nuummi kangerlunni sumiiffinni arlalinni takuneqarluni.
Angummillu tunumi tallimanngormat ajortoortoqarpoq. Taannami Mestervigip eqqaani Trailliup immikkeertivimmi nannumit saassunneqarpoq.
Tamanna Kalaallit nunaanni Politiit pigaartuisa pisortaata, Anette Ostenfeldtip uppernarsarpaa. Politiit pisoqarnera pillugu tallimanngormat nalunaaqutaq 11.34 nalunaarfigineqarput.
Angut tyskinut ilisimatusartoqatigiinnut qeqertamiittunut ilaatilluni nannumit naapitsipput.
Ataaseq kisimi ajoquserpoq, taannalu Mestervigimukaanneqariarluni kingornatigut Islandimi napparsimmavimmut aallarunneqarpoq.
Politiit oqarnerat naapertorlugu angut arfininngormat ajorneruleriartunngilaq, ilaqutaasullu ilisimatinneqarsimallutik.
Nanoq aallaaneqarpoq, Ittoqqortoormiinilu politiit aallarussinermut ikiuukkiartorput.
