Angut inuusuttoq toqungasoq Illoqqortoormiuni nassaarineqartoq: 54-inik ukiulik ernerminik toqutsisimasutut unnerluutigineqarpoq
Politiit apuunnerminni nakorsamik aggersaapput, angutillu toqusimanera uppernarsarneqarluni. Angut pineqartoq 27-nik ukioqarpoq maannamullu misissuinerugallartut takutippaat toqutaasimassasoq.
Pisoq politiinit misissuiffigineqaleruttorpoq, toqutaasullu angutaa 54-inik ukioqartoq pasineqarluni tigummigallarneqarpoq toqutsisimasutullu unnerluutigineqarluni.
- Toqutaasup toqutsisullu ilaqutariipput, tigummigallarneqartorlu toqutaasumut ataataasoq ilumoorpoq.
- Tigummigallarneqartoq eqqartuussivimmut sassartinneqarnermini toqutsisimasutut unnerluutigineqarpoq. Toqutsisimasutulli unnerluutigineqarnini akuerinngilaa eqqartuussivimmilu oqaatigaa unnuk taanna susoqarsimaneranik eqqaamasaqarani, Claus Risbjerg Nunatta Politiivini allaffissornikkut pisortaq KNR-imut taama oqarpoq.
Savimmik kapitereerluni pisussimavoq
Toqutaasup angutaa tallimanngormat nammineerluni politeeqarfiliarsimavoq erninilu savimmik kapisimallugu politiinut oqaluttuarisimallugu. Ernerata kapitissimagaluarluni angerlarsimaffimminit ingerlarsinnaasimasoq nutaarsiassaqartitsivik Ritzau allappoq.
Claus Risbjergip aamma oqaatigaa 27-nik ukioqartoq saniliminukarsinnaasimasoq saniliatalu politiit kalerrissimagai. Politiit apuukkamik nakoramik aggersaapput, angutilli inuusuttup inuunera annaanneqarsinnaasimanngilaq.
- Ilaatigut Tasiilamit Nuummiillu sulisunik Illoqqortoormiuliartitsilerpugut, aamma Danmarkimit nakorsaq toqusunik misissuisartoq aggersarneqareerpoq. Misissuinerillu taakku pereerpata unnuk taanna qanorpiaq pisoqarsimanersoq paasineqassasoq naatsorsuutigineqarpoq, Claus Risbjerg oqarpoq.
Taamaammat politiit paasissutissanik allanik maannakkorpiaq saqqummiussisinnaanngikkallarput, toqutsinermullu suna pissutaanersoq aamma suli paasineqarsimanani.
