Angut Sermersuarmi ajunaartoq
Angutip Ilulissat eqqaanni sapaatip-akunnerata naanerani ajutoortoqarnerani ajunaarsimanissaa politiit ilimagaat.
Sermitsiaq.AG taama allaaserisaqarpoq.
Angut Ilulissat avannaata kangiani maqaasineqartutut arfininngormat unnulersoq nalunaarutigineqarpoq, arfininngormalli ujaasisoqaraluarpoq, ujaasinerli ippassaq ullup-qeqqata missaani unitsiinnarneqarpoq, ajunaartoqarsimaneranik takussutissaqarnera pissutaalluni.
- Ujaarineqartup sermersuarmi qupparmut nakkarsimaneranik takussutissamik nassaarsimavugut, politiit pigaartuisa pisortaat Brian Thomsen Sermitsiamut oqarpoq.
Angutip ajutoorsimanissaa, angutillu toqukkut qimagussimanissaa ilimanartoq taassuma oqaatigaa.
Angut pineqartoq nunamit allameersuusoq Brian Thomsenip oqaatigaa, angutillu qanigisai angalaaqataasimasut politiit oqaatigaat, qanigisaalu ilisimatinneqareerlutik. Sermitsiaq.AG taama allaaserisaqarpoq.
