Angut Nuummi aallaasersornermi kingorna pasineqartoq

Angut 25-nik ukiulik Nuummi Nuussuarmi ippassaq aallaasersortoqarnerata kingorna tigusarineqartoq maanna pasineqartoq, sillimasut pisortaata, Aputsiaq Hansenip paasissutissiissutigaa.

- Angut najugaqarfiusumut seqqorsimanini pissutigalugu inuit allat inuunerannut timikkullu ajoquserneqarsinnaanerannut navianartorsiortitsisimasutut pasineqarpoq. Najugaqarfiusumilu seqqorsimasutut aamma pasineqarluni, sillimasut pisortaat oqarpoq.

Aneerasaartarfiup assiaqutaani igalaaq aserorsimasup, aallaasimillu seqqorneqarnermini putoqartup qerititsiviullu aamma eqqorneqarsimasup videoliarineqarnera inoqatinut attaveqaatikkut siammarterneqarpoq.

Videop imarisai politiinit uppernarsarneqarput.

- Aqerlup qerititsivik aamma akimorsimavaa, aqerlullu illup iigartaanit silarlermit unitsinneqarsimavoq, taamaammat inunnik ajoqusertoqanngilaq, Aputsiaq Hansen oqarpoq.

Angut politiit oqarnerat naapertorlugu pingasoriarluni seqqorpoq, seqqorfigisaani marluk allat sumiissusersinngikkitik, sillimasut pisortaata oqaatigaa.

Eqqissisimasumik tigusarineqartoq

25-nik ukiullip ippassaq tigusarineqarnera eqqissisimasumik pivoq, Sarfaannguinilu assersuineq taamaatinneqarluni.

- Innuttaasut sumiiffimmi nalinginnaasumik toqqissisimallutillu angalasinnaaleqqipput. Toqqissisimanngikkaanni politiinut attaveqartoqarsinnaajuaannarpoq, sillimasut pisortaat oqarpoq.

Taassuma innuttaasut, politiit misissueqqissaarneranni iluaqutaasinnaasunik, takunnissimasut politiinut attaveqarnissaannik aamma kaammattuuteqarfigai.

Suliaq politiinit maanna suliarineqarpoq, pinerluuteqartullu seqqornerata sumik pissuteqarnera oqaatigissallugu siusippallaarpoq.