Angut Kleist inuaqatigiinnut kiffartuussissaaq

1,3 millionit koruunit Nanortalimmiup aningaaserivimmi kontoanut, qallunaat aningaaseriviisa ilaannit kukkuluttornikkut ikineqarsimasut pillugit, Nunatta Eqqartuussiviata aalajangigaa, Qallunaat Nunaanni Eqqartuussiviit qullersaannit atuuttussanngortinneqarpoq.
Allattoq Elisa Isaksen
januaarip 27-at 2012 11:07

Aningaasat Angut Kleistip kontoanut ikineqareersullu, aningaaserivimmit arlaleriarluni uppernarsineqartarpoq, Angut Kleistip aningaasat ilumut pigigai, tassalu tamatuma kingorna Angut Kleistip aningaasat 400.000 koruunit atorpai, ilaatigut umiatsiaarartaarluni ilaquttanilu oqarasuaatinik angallattakkanik tuniorarlugit.

Tamatuma kingorna Angut Kleistip tusaamaassutigilerpaa, Nanortalimmi pisiniarfiup, Brugsenip eqqaani nunaqqatiminut atugarissaannginnerusunut aningaasanik agguaassisarsimanini.

Aningaasanik nammineq piginngisanik atuisimasutut, Angut Kleist Nunatta Eqqartuussiviani eqqartuunneqarami, pineqaatissinneqarpoq nalunaaquttap akunnerini 100-ni inuiaqatigiinni kiffartuussisussanngorlugu, tamassumalu saniatigut imigassamik ajornartorsiuteqarneranik aammalu tarnikkut katsorsarneqarnissaanik pineqaatissinneqarluni, tassalu tamakkuupput Angut Kleistip illersuisuata piumasarisai, tassalu taakkulu Nunatta Eqqartuussivianit aalajangiunneqarlutik.

Qallunaat Nunaanni Eqqartuussiviit qullersaannit Nunatta Eqqartuussiviata aalajangiussaat taassa allanngortinneqanngitsut ullumi eqqartuussinermi paasinarsivoq.

Eqqartuussiviit qullersaanni eqqartuussisoqarmat, unnerluussisunit Angut Kleist pineqaatissinneqarsimasut inissiisarfiiniittussanngorlugu piumasarigaluarpaat, illersuisuatali, Wilhelm Mallingip Nunatta Eqqartuussiviani pineqaatissiinerup atuutsinneqarnissaa piumasaralugu, tassalu taassuma piumasaa Eqqartuussiviit qullersaannit aalajangiunneqartoq.

Angut Kleist pillugu suliaq Nunatsinni malinnaaffigineqarluarpoq, allaat Facebookimi Angut 2805-inik ikinngutitaarsimavoq allaallu angut pillugu erinarsuusiortoqarsimalluni.

Qallunaat Nunaanni Eqqartuussiviit qullerssaanni eqqartuussineq, qallunaat naalagaaffiata akiligassaraa.