Angut inuusuttoq højskolimi pinngitsaaleeriarsimasutut eqqartuunneqartoq
Angut 18-inik ukiulik Aarhusip eqqaani inuusuttunut højskolimi ataasiarluni pinngitsaaleeriarsimasutut nivissanullu marlunnut sakkortuumik nakuusersimasutut Aarhusip Eqqartuussiviani eqqartuusseqataasoqartillugu marlunngormat eqqartuunneqarnerami inissiisarfimmiittussanngortinneqarluni pineqaatissinneqarpoq.
Innarlerneqartut pingasuusut atuarfimmi atuartuutillutik siorna septembarip qaammataani unnuakkut innarlerneqarput. Østjyllandip Politiivini unnerluussisut pisortaat Birgitte Ernst taama ilisimatitsivoq.
Angut 18-inik ukioqartoq nivissat atuarfimmi inaannut isertersimanini pissutigalugu pineqaatissinneqarpoq. Nivissat sinittut atisaajarsinnarluni siniffiinut innarsimavoq.
Niviarsiaqqap aappaa qallersimavaa aalajangersorlugulu, aamma pinngitsaalillugu arneriffiginiarnerani toqqusassissimavaa kiillugu. Niviarsiviararli akiuulluni qimaammat arneriniarnini iluatsinngilaa.
Tamatuma kingorna niviarsiaqqap aappaa saassuppaa. Tassungali atatillugu pinngitsaaliilluni arnereriaraluarsimasutut pinngitsuutinneqarpoq, niviarsiaqqallu qimaannginnerani toqqusassissimammagu assaatigullu kiisimammagu sakkortuumik nakuusersimatutut pineqaatissinneqarpoq.
Eqqartuunneqartoq inuusuttunut højskolimi innarliinermini 17-inik ukioqarpoq. 2014-imi toqumut sioorasaarisimasutut 2013-imilu tillinniarsimasutut aamma eqqartuunneqarpoq. Taakku Nunatsinni Upernavimmi pisimapput.
Angutip inuusuttup eqqarsartaatsimikkut annertuumik innarluutillit angerlarsimaffiannut inissinneqartussatut pineqaatissinneqarnissaa unnerluussisup piumasaqaatigaa, eqqartuusseqataasoqartillugulu eqqartuussinermi sivisunerpaaffilernagu inissinneqartussatut pineqaatissinneqarpoq.
- Sakkortuumik pineqaatissiineruvoq, taamaammat aamma eqqartuusseqataasoqartillugu eqqartuunneqarpoq, Birgitte Ernst oqarpoq. Eqqartuussut naammagisimaarpaa, naak angutip pineqartup marloriarluni pinngitsaaliilluni arnereriaraluarsimasutut eqqartuunneqarnissaa piumasaqaatigisimagaluarlugu.
Inissinneqartussatut pineqaatissiinermi aalajangerneqarpoq angutip inissiisarfimmiittussanngortinneqarnerata eqqartuussisumit aalajangiiffigeqqinneqarnissaata tungaanut inissiisarfimmiitinneqassasoq.
Angut inuusuttoq eqqarsarfissaqarnissani noqqaassutigaa, eqqartuussullu nunatta eqqartuussivianut ingerlateqqissanerlugu maanna isumaliutigalugu.
/ritzau/
