Angut congomiu checkimik peqquserluuteqartoq Savalimmiuni parnaarussaavoq

Angut 46-nik ukiulik Congomeersoq checkimik ½ millioni koruuninit annertunerusumik nalilimmik Savalimmiuni aningaaserivimmut ikiseriarluni ullut arlalialunnguit qaangiuttullu aningaasat tigoqqissimavai. Savalimmiunilu parnaarussaagallarpoq, peqquserlussimasutut peqquserlullunilu allagaasiorsimasutut unnerluutigineqarluni.
septembarip 29-at 2008 07:16

46-nik ukiulik timmisartorluni Savalimmiunut tikippoq. Tikinnermi kinguninngua aningaaseriviliarpoq, checkilu 110.000 US-dollarinik nalilik aningaaserivimmut ikillugu, tassa 560.000 koruunip missaa.

Ulloq taanna Brüxellesimut uterpoq, ullullu arlalialunnguit qaangiuttullu Savalimmiunut uterluni, aningaasallu taakku tamaasa tigoqqippai. Aningaasaserivimmi sulisut ajortoqarneranik pasitsakkamik politiit attavigaat, angullu Thorshavnip qeqqani unnuisarfiit ilaanniittoq tigusarineqarpoq. 46-nik ukiulik marlunnik passeqarsimavoq, assigiinngitsunik ateqartutut allassimalluni, aningaasallu amerlanersaat qitequmminut toqqoqqagai paasineqarpoq.

Checki matussutissaqanngitsoq paasineqarpoq. Angut nassuiaavoq angutip allap Belgiameersup qinnuivisimagaani Savalimmiunukarluni aningaasat aaqqissagai. Taamaaliornermini aningaasat 10 procentii pissagai neriorsorneqarsimavoq.

Sapaatip akunnerini sisamani parnaarussaanissaminik kalerrinneqarami angut qiallunilu kamaqaaq. Taama sivisutigisumik parnaarussaanissaanut pissutaavoq, pisup Belgiamut attaveqarnerata misissornissaa piffissaq sivisooq atorlugu ingerlanneqassammat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq