Angut ataaseq Nuummi toqutsisimasutut pasisaavoq
Angut 20-it qeqqannik ukiulik ulluni 28-ni tigumigallagassanngortinneqarpoq ataasinngornermi unnuakkut Nuummi toqutsimasutut pasineqarluni. Tigusarineqartut marluk ippassaq iperagaapput.
Allattoq Noah Mølgaard
septembarip 05-at 2012 08:14
Angut pasineqartoq marlunngornermi unnukkut inatsisit tunngaviusut tunngavigalugit eqqartuussivimmi killisiorneqarpoq illoqarfiup ilaani Nuussuarmi toqutsisimasutut pasineqarluni. Paasissutissalli politiinit avammut saqqummiunneqartut ikittuinnaapput killisiuineq matoqqasumik ingerlanneqarmat.
Toqutsiffiup eqqaani najugallit Qanoruumut oqaluttuaraat nipituumik nipilersortoqarsimasoq, nilliasoqarluni nipiliortoqarlunilu. Aamma oqaluttuaraat issiaviit nerriviillu inissiap iluani miloriunneqartarsimapput. Taamalu pisoqarnerani angut 60-it qeqqanni ukiulik toqutaavoq.
Toqusut timaannik misissuisartoq aamma pinerluttoqarsimatillugu paasiniaaqqissaartartut Danmarkimiit tikissapput Nuup politiivisa paasiniaaneranni ikiuukkiartorlutik.
