Angut aalakoortoq Nuummi Brugsenimi eqqissiviilliortitsisoq
Angut aalakoortoq Nuummi Brugsenimi, silataanilu, ullumi ullaap tungaani eqqissiviilliortitsivoq, allaallumi persuttarneqarluni.
Angut taanna pisiniartunik Brugsenimilu sulisunik oqqassaarisimasoq, Brugsenimi immikkoortortap pisortaata Jes Nyborgip oqaatigaa, angutillu paarsisumit taamaammat pisiniarfimmit anisitaanissaa piumasarisimallugu.
Angut Brugsenimit anisitaalersorlu inunnit allanit tiguneqarsimavoq, arlaleriarlunilu tilluarneqarsimalluni.
Brugsenimi paarsisoq politiinik kingorna kalerriivoq, persuttaasunulli akulerukkumasimanani. Soorlu immikkoortortap pisortaa Jes Nyborg oqartoq, paarsisup suliassai pisiniarfiup iluaniipput, silataaniinnatillu.
Nuummi Brugseni aalakoortunik ulluinnarni ajornartorsiuteqarneq ajortoq, Jes Nyborgip oqaatigaa, tassami aalakoortunik siumuisoqaraangat, pisiniarfimminngaanniillu aninissaat piumasarineqaraangat naalattarnerat nalinginnaasuummat.
Pisiniarfimmit anisitaasup ingerlaannartumik persuttarneqalernera aamma nalinginnaasuunngitsoq, taassuma aamma oqaatigaa.