Angut 56-inik ukiulik toqutaasimagunartoq
Angut 56-inik ukiulik Sisimiuni toqutaasimagunartoq ippassaq nassaarineqarpoq.
Sisimiuni politiit angut 56-inik ukiulik inigisamini toqungasoq ippassaq sapaammi ualikkut nalunaaqutaq sisamanut qiteqquttoq nassaaraat.
Danmarkimi politiit paasiniaasartoqatigiivi teknikki atorlugu misissuisussat aggersarneqareerput, maannakkulli annerusumik oqaaseqarusunngikkallarlutik, politimesterip tullersortaa Morten Nielsen oqarpoq.
-Salloqittaalluni toqutsisutut nalunaarnerit pinngitsoortinniarlugit annerusumik oqaaseqarusunngikkallarpugut. Maanna misissuinerput aallarteruttorparput. Paasisaqarnerugutta paasissutisseeqqissinnaajumaarpugut, Morten Nielsen oqarpoq.
Sisimiuni qaammatit arfineq-marluk matuma siornagut kingullermik toqutsisoqarpoq, taamani arnaq 29-nik ukiulik, HTX-imi ilinniarnertuunngorniaq Louise Hegelund kollegiami inigisamini toqungasoq nassaarineqarpoq. Politiit misissuinerat taamani qaammatinik sisamanik sivisussuseqarpoq, paasisaqannginnerullu nalaani innuttaasut arlallit toqqissisimanatik radioavisimut tutsiuttarput.