Angut 55-inik ukiulik tupilannik tillikkanik tuniniaasimasutut pasineqartoq
Angut Danmarkimeersoq 55-inik ukiulik sapaatip-akunnerini sisamani ullumi tillikkanik tuniniaasarsimasutut pasineqarluni tigummigallagassanngortinneqarpoq.
Angut maanna tigummigallarneqarpoq, taannani pisuunnginnerartoq Ritzau allaaserisaqarpoq.
Østjyllandimi politiit angutip Randersimi najugaqarfiani pakasaallutik misissuimmata tupilaat amerlasuut siumorpaat.
Tupilaat Jyllandip avannaani Thymi najugaqarfiit ilaannit 2010-mi tillinneqarput, katersallu taakku 2,5 millionit koruunit missaannik naleqassangatinneqarlutik.
Angutip najugaqarfia suliamut allamut atatillugu politiinit pakasaalluni misissuiffigineqarmat tupilarpassuit nassaarineqarput. Sulia alla sumut tunnganersoq ilisimaneqanngilaq.
- Suliamut allamut atatillugu pakaalluta misissuinitsinni eqqumiitsuliat katersat nassaaraagut, Jakob Christiansen Østjyllands Politiini attaveqaqatigiinnermut siunnersorti TV2 Østjyllandimut oqarpoq.
Politiit nassaarisatik eqqarsarnartoqartippaat katersallu ukiualuit matuma siornani tillinniarnermi tillinneqarsimasut paasigaat, taanna oqarpoq.
Angut inatsit tunngaviusoq naapertorlugu killisiorneqarmat sapaatip-akunnerini sisamani tigummigallagassanngortinneqartoq Ritzau allappoq.